A Poituk Ee: SAC Ralhrang Nih Minung 9 An Thah Hna, Hngakchia 2 An I Tel Ee

A Poituk Ee: SAC Ralhrang Nih Minung 9 An Thah Hna, Hngakchia 2 An I Tel Ee

Yedashi Ah SAC Ralkap Kut In Nunnak Liam Mi Ngakchia 2 Telh In Ruak 9 An Hmuh

Bago ramṭhen, Yedashi pengchung April thla thawk in April ni 11, tiang ah SAC ralkap kut in thah a tongmi sualnak ngeilo tualchung mi hna ruak 9 kan hmuh tiah tualchung mi nih an chim.

Yedashi pengchung ah SAC ralkap kut in hnawngtan thah a tong mi pa pahnih ruak cu Sittaung tiva ah char an si hnu nihin April 11 zong ah thah a tong mi ngakchia pahnih ruak le nu pahnih ruak an hmuhchap hna tiah theih a si.

“PDF caah rawl nan chumhpiak hna tiin nupa hna cu SAC ralkap nih an hngawng an tan hna hnu ah Sittaung tiva ah an hlonh hna. Tualchung mi 12 an tlaih hna, tlaih a tongmi chung ah hliamhma a tuarmi 10 cu an thlah ṭhan hna nain 2 cu an thah hna. Nihin tiang ah ruak 9 kan hmuh cang” tiah ruak chartu pakhat nih a chim.

SAC ralkap hna cu Yedashi pengchung rallam an sialnak lampi ah tualchung mi cu tlaih in an thah hna, April 11 tiang ah ngakchia 2 telh in ruak 9 hmuh a si cang tiah tualchung mi nih an chim.

Yedashi peng, Kyaukkyi peng, Shwekyin peng, Nyaunglaypin peng ah March thla thawk in SAC ralkap le tualchung hriamtlai phu kar fakngai in kahdohnak a chuak tiah theih a si.