A Poituk Ee: Ralzaam Tar 2 Ralhrang Nih An Thah Hna

A Poituk Ee: Ralzaam Tar 2 Ralhrang Nih An Thah Hna

Sagaing ramṭhen, Kanbalu peng Pazikyi khua lei ah rallam sialtu SAC ralkap nih nihin April 20, zinglei ah ralhrial dirhmun in a ummi tar 2 an thah hna tiah tualchung mi nih an chim.

“Pazikyi le Mezataw khua kar ah tar 2 cu SAC ralkap kut in thah an tong, SAC ralkap hna cu an kal rih lo caah an ruak zong laak an si rih lo” tiah ralhrial mi pakhat nih a chim.

Thah a tongmi hna hi Pazikyi khua pawng Htantaw khuami U Maung Ko Lay(kum 70) le U Tin Myint hna an si. Rallam sialtu SAC ralkap hna hrial ding in an tlik khawh ti lo caah thah an tong tiah tualchung mi pakhat nih a chim.

Pazikyi khua ah rallam sial in a lutmi SAC ralkap hna hi 300 hrawng an si i April 19 zing in Mandalay ramṭhen Thabeikkyin lei in aa thawhmi an si tiah an chim.

Pazikyi khua cu hmun hnih in SAC ralkap nih rallam an sial i khuachung an thlok dih caah Pazikyi khua telh in khua 7 um tualchung mi hna cu ral an hrial ṭhan tiah theih a si.Crd.. TCP