Falam Peng, Taal Khua ah SAC Ralhrang nih Biakinn an Tlok, Innzuat Sattil an Thah Dih; Falam peng, Taal khua ah SAC ralhrang pawl ni 5 chung an caam i biakinn telh in innchung thilri an tlok dih hna.
Khuami hna i innzuat sattil vialte zong an thah i an ei dih hna, tiah khuami pakhat nih a chim. “Biakinn chung ah an duhduh in an lut. Biakinn chung zong a rim a chia dih cang. Khuachung inn pawl zong meithal in an kah dih hna. Inn 20 hrawng hi cu a thar in sak tthan an hau lai,” tiah a cunglei khuami nih a chim.
Atutan hi SAC ralhrang nih Taal khua a voi hnihnak an luh hnawh a si. Aluancia July 22 ah SAC ralhrang pawl Taal khua ah an rak lut i, inn 26 chung ah inn 21 an bauh. Tangka le thilri tampi an fir/an hrawh dih hna.
July 22 lio ah SAC ralhrang nih Taal khuachung thil an hrawhmi le an firmi hi azapi ah ting 150 MMK man a si lai, tiah khuami nih an ruahdamh. The Chin Journal
Relchap:Minkin Ah Ralhrang Zu Ri Nih Sualnak Ngei Lo Mipi An Kahthah Hna August 17 zanlei suimilam 2 hrawngah Sagaing ramthen, Minkin ah zuu ri mi ralhrangbu hna nih civil mi pakhat cu naih tein an kah, nu pahnih zong hliam an pu tiah mit in a hmuhmi hna nih an chim.
Hi thil hi Mungyua in Minkin lei a kal mi Minkin tilawng dinhnak hmun ah a cang mi a si i, tiva kam lungcungah Kunya a khai lio mi Ko Zaw Myo Myint (kum 39) cu zuu ri mi rallokap pakhat nih ziah na hmai na huh lo tiin a hal.
Ko Zaw Myo Myint hi Mungyua ah a kal ding mi tilawngah naupawi mi pakhat a rak thlah mi a si.Tilawng dinhnak ah hmaihuh a phoih i kunya a khai lio a si. Ngaihthiam a hal zong ah a duh lo i, an chuih, an lamh hnuah rallokap pahnih nih a khua an hal i, Minkin a ti hnuah Kyuntaw nitlak lei ka si a ti than ruangah na lih tiin a lu ah meithal sawh pah in an kah tiah a hmuhmi nih an chim.
Meithal hi voi 2-3 an kah ruangah tiva kam ah a thu lio mi hna lak ah nu pahnih hliam an tuar, pakhat Ma Zin Mar Win cu a thi cang tiah Minkin khua mi sin in theih a si. Zaw Myo Myint hi nupi le fa 3 a ngei mi a si.A ruak hi khua zeidah an kalpi ti zong theih a si rih lo pinah a chungle sin zong ah thawng an thanh rih lo tiah Kyuntaw khuami nih an chim. Ref; Myanmar Now
Leave a Reply