Yesagyo Peng Ah Tualchung Mi 2 SAC Ralkap Nih An Thah Hna
SAC ralkap nih Magway ramṭhen, Yesagyo peng Milaungkyun(မီးလောင်ကျွန်း) khua cu rallam sial in an luhhnawh, tualchung mi 2 cu tlaih in an thah hna tiah Myaung peng tualchung hriamtlai phu in ṭuanvo ngeitu nih a chim.
March ni 19, zinglei suimilam 5:30AM hrawng ah Yesagyo peng Milaungkyun khua cu SAC ralkap nih meithal i puah pah in an luhhnawh.
Khuachung ah ralhrial dirhmun in a ummi hna caah rawl chumtu U Maung Han cu SAC ralkap nih an tlaih hnu ah an thah pin ah March 30 ah thluak lei tlamtling lomi Maung Myat Soe Oo cu PDF thuam hrukter in nam in an tuk caah a nunnak liam tiah theih a si.
Rallam sialtu SAC ralkap hna nih cun tualchung mi hna innchung ah lut in phone, sui, phaisa le an duhmi thilri paoh i laak in an firpiak hna, phungki sianginn a ummi hna zong an tlaih hna i an thilri phone le sui an chuh hna.
SAC ralkap hna cu khuachung in an kir ah an tlaihmi hna cu an thlah ṭhan hna, tualchung mi hna thirleng(cycle) zong tamlak an khanghpiak hna tiah theih a si.
Leave a Reply