Ralhrangbu Nih Kalay Peng Tintar Khua Mei In An Khangh Sagaing remthen Kalay pengah a um mi Tintar khua cu ralhrangbu nih nihin August 28 chun suimilam 12 hrawngah mei in an khangh caah inn cheukhat mei nih a kang dih tiah theih a si.
Ralhrangbu nih Tintar khua ah PDF he an i kah hnuah khua hi an luhhnawh caah khuami thong leng an zaam. An khua siangcachim U Kyaw Min Naing chawdawr cu an khangh hmasa i a khua ningin a kang dih men lai. Atu zong inn tam ngai a kang cang tiah khuami nih an chim.
Ralhrangbu hna hi August 26 ram lakin Tintar khua ah an luh hi a si i, ralhrangbu in a zaam mi an rak dawi mi a si. PDF hna nih khuachung luhtter an duh ruangah an kah hna hi a si. Ralhrangbu hi minung 80 hrawng an si i, thazaang zong an i chap.
Zan suimilam 6 hrawngah fak ngaiin an i kap i, ralhrangbu nih hriamngan he khuachung an kah ruangah PDF nih an kir tak tiah theih a si.
Tintar khua hi inndong 1000 leng a si i, ralhrangbu nih an luhhnawh ruangah a zaam mi 2000 hrawng an si.Tuzanlei suimilam 3 tiang an khua cu mei a kang cuahmah rih ko tiah khuami nih an chim. Ref; DVB
Leave a Reply