Kan hnu zarh August 14 zarhte ni ah magnitude 7.2 in Haiti ah lihninh ruangah chanhchuahnak rian cu tuan cuahmah rih a si i,atu tiangah nunnak liammi 1,419 an si i, hliam a tuar mi 6,900 leng an si tiah theih a si.
Atu hi thli le ruah tampi a sur ding dirhmun a si caah chanhchuahnak rian zong rianrangin kalpi a si.Lihnin nih inn, sianginn le biakinn hna tampi a hrawh i, minung 30,000 cu inn le lo ngei lo in an um i, bawmhtu phu hna nih umnak inn le dinti an herh ngai tiah an chim.
Chanhtu rian hi American le Chile nih an bawmh hna pin ah Cuba sii lei thiam mi hna zong Haiti hi an phan cang tiah theih a si. Lihnin nih Haiti ram nitlak thlanglei Les Cayes khuapi cu fak piin a hrawh tiah theih a si. Apple company chief executive officer Tim Cook nih Haiti lihnin ruangah a rawk mi inn le lo hna dirh than nak ding le chanhchuahnak caah kan bawmh lai tiah twitter in a thanh ve.Ref; bbc
Relchap: China Cu Taliban He Pehtlaihnak Tuah Dingin Timhcia A Si Cang; Afghanistan cu Taliban nih an lak dih hnuah Afghanistan he pehtlaihnak tha deuh ngeih dingin timhcia kan si cang tiah China ramdang lei vuanci chimnak nawlngeitu Hua Chunying nih a chim.
China le Afghanistan hi meng 76 a kau mi ramri a ngei mi ram an si. Xinjiang ah Wigha miphun tlawmte cungah China nih nuhrin covo a buarnak le Islamic pawl cawlcanghnak kongah Afghanistan cu hmunpi pakhat ah a cang khomi a si ruangah China a thin a rak phan ngai mi a si.
Asinain,China ramdanglei vuanci Wang Yi le Taliban hruaitu hna kan hnu thla Tianjing ah an i ton hnuah Taliban hruaitu hna nih Afghan mi hna i dornak hmunah kan can ter lo ding le China zong nih Afghanistan ram sersiamnak caah kan bawmh lai tiah biakamnak an ngei.
China nih, US nih Afghanistan ah a um mi a ralkap hna a lak hnu ah Taliban pawl he a thliin pehtlaihnak a rak tuah hna i, kaphnih hnatlaknak zong an tuah. Hua Chunying nih; Afghanistan he pehtlaihnak tha deuh ngei dingin kan duh, Taliban pawl zong nih China he pehtlaihnak tha ngeih an duh ve.Anmah nihcun Afghanistan sersiam thannak le thanchonak caah China nih bawmh ding hi an ruahchannak pakhat a si.
China nih Afghan mi hna anmah tein khuakhan lairelnak an ngeih khawh mi cungah upatnak kan ngei i, an thancho zong kan duh pi hna. Afghanistan he remnak le pehtlaihnak tha kan ngeihmi cu China nih cinken peng kan duh tiin a chim. Kabul i China embassy zong a hlan bantukin on peng a si i, Afghanistan ah a umi an minung hna cu leng chuak lo dingin an ti hna tiah Al Jazeera news nih a chim.
Leave a Reply