A Poituk Ee: Kahdohnak Faktuk A Chuak Mipi Ralkap Minung 5 An Thi Than

A Poituk Ee: Kahdohnak Faktuk A Chuak Mipi Ralkap Minung 5 An Thi Than

Sagaing ramṭhen, Myaung peng Letyetma khua pawng kahdohnak ah PDF 5 an nunnak a liam, tiah Myaung Revolution Army(MRA) nih cathanh an chuah.

March ni 24 ah Myaung peng ah rallam a sialmi SAC ralkap le MRA kar ah kahdohnak a chuak i PDF ralkap Phe Kyi, Pua Kyi, Ashi Kyi, Bilu le ralkap Kyauk Se hna nih an nunnak an pek, tiah theih a si.

SAC nih cathanh an chuah ning ah cun March ni 24 zanlei suimilam 1:00PM ah Letyetma khua pawng kahdohnak ah PDF ruak 5, M22 zun 5, kuan bawm, kuan, kutser meithal, kutser hriamngan, battery, solar le leilawng pakhat an laak, tiah an langhter.

Sagaing ramṭhen, Sagaing peng Mandalay-Shwebo leilawng lam Thitkone khua pawng ah SAC ralkap leilawng 2 cu bomb in kan puahhnawh caah 1 a rawk, tiah Naysimachia phu nih an langhter.

March ni 26 zing suimilam 5:47AM ah Sataung palik sakhan in Tatma 33 ah a kalmi leilawng 2 cu Naysimachia phu nih bomb lung 3 in an puahhnawh caah 1 a rawk. SAC ralkap nih hriamngan le hriamhme he an kah ko hna nain PDF lei a thimi le aa hliammi an um lo, tiah theih a si.

Relchap>>>>Kachin ramkulh, Mohnyin khua ah CDM hna le ramkhel rianṭuan(politician) a tlaitu, thawng hlathlaitu chungtel La Min Htun telh in minung 3 kan fimhlawm hna, tiah Kachin Region People Defence Force(KPDF) in ṭuanvo ngeitu nih a chim.

March ni 26 zanlei ah Mohnyin khua um rithaisii a zuartu hna, ngunkhuai a khawl i ral lei humhimnak latu, Sah Yah Phah chungtel La Min Htun telh in minung 3 cu Nyaungkone khua pawng ah KPDF nih an fimhlawm hna, tiah theih a si.

“Kan kah hna caah 2 an thi i La Min Htun cu a zaam nain a zam lioah kan kah caah a thi. A thimi 2 chung ah 1 hi Sah Yah Phah cazipi a si, a dang 1 hi Sah Yah Phah thawngpetu a si. Rithaisii zuartu hna ngunkhuai an va khawlh hna i an ṭin lei ah kan thah hna,” tiah KPDF in ṭuanvo ngeitu nih cun a chim.

KPDF nih La Min Htun a phone kan laakpiak i amah he aa pehtlaimi minung 8 zong an hlathlai khawh hna. Mohnyin khua chung ah La Min Htun he i bawm in rian a ṭuanmi hna hi khuabawi chungtel hna le USDP hna zong an i tel, tiah KPDF in ṭuanvo ngeitu pakhat nih a chim.Crd.. TCP