Mindat-Matupi Karlak Kahdohnak ah CDF-Matupi in Mino 3 nih Ram le Miphun ca ah Nunnak an Pek; Nizaan (July 30) ah a cangmi Mindat-Matupi karlak kahdohnak ah CDF-Matupi in mino 3 an nunnak a liam, tiah CDF nih thawngpang an chuah.
A nunnak a liammi hna cu:-Salai Kung Thang-Salai Ha Tun-Salai Thang Chin Sang hna hi an si. SAC ralhrang lei in Lieutenant Colonel Zaw Zaw Soe telh in ralhrang 10 a thi ve, tiah thawngthanhnak ah an langhter. July 25 le 27 kahdohnak zong ah CDF-Matupi in Salai Zaw Myint Phe le Salai Tun Shwe an nunnak a rak liam cang. The Chin Journal; July 31, Yangon
Relchap; KNA le KNDF Fonh In Ralhrangbu An I Kap Loikaw peng Dotmukala khua ah Kareni Army (KNA) le Karenni National Defence Force (KNDF) hna fonh in ralhrangbu he nihin July 31 chun 11 hrawngah an i kap tiah KPDF nih an thanh.
Ralhrangbu rallokap lei a thi le hliam mi an um. Atu hi fehter dingin kan zohfel lio a si tiah tuanvo ngeitu sin in theih a si. Atu hrawngah KNA umnak lei ah ralhrangbu an rak luh caah kaphnih kahdohnak a um pah lengmang.
Kan hnu zarh ah Karenni ram Loikaw nichuahlei ah a ummi KNPP/KA battalion No. 3 umnak lei ah ralhrangbu tat-mah 66, khah-lah-yah 530 an luh caah voi 5 renglo an i kap i, ralhrangbu lei a thi mi le hliamhma pu mi an tam caah an kir than tiah theih a si.
Karenni National Defence Force (KNDF) hi ralhrangbu doh dingah ralhrangbu a doh mi zei hriamtlai bu he kan tuanti lai tiah a thanh mi an si.# the nation voice
Leave a Reply