Ralkap Council nih Covid pulrai cu ram mipi teinak hriamnam thatuk ah a hun hman cang. Covid pulrai hmang in rampi uknak cu a mah control khawh mi ah chiah ding in a timh ko cang.
“Ralbawi Zaw Min Htun nih, Ram mipi nih thildik an theih cuahmah cang, Ralhrang pawl (NLD, NUG le CRPH pawl khi Ralhrang tiah a auh ve hna cuh) cawlcanghnak a dik lonak mipi nih an theih cuahmah i a tu ahcun Ralkap lei ah mipi an ra cuahmah cang. Cu caah Ram mipi caah kan rianttuan nak, cawlcangh nak zong a hlan nak in a khur a rang deuh cang lai” tiah a chim.
Hi bia a chim hi nizaan ah a si, Covid zawtnak nih faktuk in Kawlram chung hmunkip a den hnu, mipi vansang in an um hnu, zaan curfew a um bu in, nunnak chanchuah a herh caah, Flag raang i put in mipi an cawlcangh hnu, ralkap sin ah zaan lengchuah nak nawl an hal hnu in a chim mi a si tiah an langhter.
A sullam cu “Ralkap nih Covid pulrai zawtnak hi, ram mipi teinak hriamnam tha taktak bantuk in a hman ti hi asi. Atu ahcun Oxygen vialte an mah ralkap nih control dih a si, mizei hmanh nih fawi tein Oxygen an hmu kho ti lo. Cu caah chungkhat unau, nulepa nunnak chanchuah a hauh fawn caah ralkap sin ah zaangfah hal in Oxygen kan pe hram uh ti caan a phan lai.
Cun zaan ah lengchuah, khuachung vah le cawlcangh hi biatak tein an rengh rih lai i an mah sin ah nawl hal lengmang a si cang lai. Nawl halnak tuah lo ahcun unau chungkhat an nunnak a liam fawn lai. Cu caah mipi caah cun a har taktak dirhmun ah kan phan, ral pahnih karlak ah kan um tinak a si”.
NUG Cozah paltlang in maw a si lo ah, Tlangcung hriamtlai phu pawl hruai nak le tlangtlak nak in maw a si lo ah, PDF, CDF ti bantuk hriamtlai hna hmang in, Ralkap hi tei colh lo, a ci hmih colh lo ahcun, Covid pulrai hmang in ram mipi tei le uknak hmunter an zuam cang lai. Atu lio hi ram mipi ca zong ah a harsatbik lio caan cu a si ko. Credit: Laikokek Journal
Leave a Reply