A Poi Ko : Ralhrang Nih Thantlang Inn Tampi An Hrawh, Thildang Tampi An Hrawh Chih

Thantlang, Sianginn Sang ah Inn 13 le Motorcycle 4 an Rawk

August 25 zaanlei Thantlang khuachung kahdohnak ah SAC ralhrang nih ralhriam ngan in khuachung inn pawl an kah ruang ah Sianginn sang ah inn 13 le Motorcycle 4 an rawk hna.
Inn 13 chung ah inn 9 hi an rawh ning a fak khun i tampi remh an hau.

August 25 kahdohnak ah kum 10 ngakchia pakhat a nunnak a liam i a dang kumtlinglo ngakchia 5 le nu pahnih telh in minung 9 hliam an pu hna. Nihin (August 27) ah a rawkmi inn an remh lio ah SAC bomb a puak lomi an hmuh i leng ah an chuah hnu ah a puak. Inntek Pu Hlei Bik a nunnak a liam i a dang minung 11 an i hliam.

Hliam a pumi 11 chung ah minung 3 hi a hliamhma a fah deuh caah Hakha sizung ah an kalpi hna.Nihin bomb puahnak a chuah lecangka in SAC ralhrang nih meithal le bomb puah thlorh in an puah len caah khuami thinphang thlalau in an um hna. The Chin JournalAugust 27, Thantlang

Relchap: Papun pengkhat ah rallokap le KNU nihnih chung ah kahdoh nak voi 11 aum.27 August, 2021

Karen ramkulh Papun pengkhat (Muthaw pengkhat) Butu peng Tumui Htar hmunhma ah KNU le rallokap hna cu nihnih chung ah voi 11 kah doh nak a um tiah August 27 zinglei ah KNU nih thawng an thanh.

KNU Brigade (5) nih runven nak hmun a si mi Tumui Htar hmunhma Khawpuh khuakawmh le Buade khuakawmh chung ah rak lut in a cawlcang mi rallokap hna le KNU hna cu August 25 in August 26 tiang ah kahdoh nak voi 11 tiang a um.

Hi kah doh nak ah hin rallokap minung 15 an thi i minung 11 an hliam tiah theih asi. August 1 ni thok in rallokap hna cu KNU Brigade (5)hmunhma chung ah an cawlcang chin i mah leng ah hriamnam hna an luh pi caah kahdoh nak cu a fak chin leng mang tiah KNLA Brigade (5) chim nak nawl ngei tu Duh – Bohmukyi Saw Ka Lay Do nih a chim.