A Poi Ko EE: Russia Le Ukrain Ram Kahdohnak Kong Thawngpang Tawi

A Poi Ko EE: Russia Le Ukrain Ram Kahdohnak Kong Thawngpang Tawi

Ukraine War Kong Tawi
Russia nih Ukraine a tuknak cu kum khat le thla khat a tling cang, zei ngaingai a phichuak a um kho ruam lo. Tulio an dirhmun ah an i cuh bikmi Bakhmut ah I kahnak cu WWII lio dirhmun ko an hluan tiah mithiam pawl nih an ti. Russian nih hriamnam ai za in ai ngeih ti lo caah a ralkap pawl hmai an nawr kho ruam ti lo.

Bakhmut ralram hmatawng ah kuatmi kan si nain hriamnam (ammunition) Russia nih a kan kua duh lo, hi bantuk cu ralram ah ningzak in mualpho hna seh tiin leirawinak bantuk asi, tiah Wagner boss Yevgeny Prigozhin nih a ti. Wagner group pawl hi Russia thongtla pawl le ramdang in phaisa in hlanmi Russia ralkap bawmtu an si. An ral a tha in thlachiat a ruat bak lomi an si.

Wagner group misual taktak le Russia ralkap nih Bakhmut cu thla ruk renglo an tuk cang nain an là kho ruam rih lo. February thla lio te in khan Russia nih hriamnam ai za in a kuat khawh ti hna lo caah Bakhmut i kan sungh asi ahcun Moscow mawh phurhnak a si lai a rak ti. Wagner bosspa nihhin Russian Defence Minister Sergei Shoigu, Russia’s defence chiefs le top generals pawl cu hriamnam kuat khawh lo ruang le Russia ralkap pawl santlaihlo kongah a rak soisel ngaingai hna.

Russian bomber thabik Tu-22m3 strategic missile-carrying bomber cu tunai kha emergency in Pulkovo Airport in St. Petersburg ah an tumter, tiah Ukraine intelligence report nih a langhter. Tu-22m3 hi nuclear capable a si i Russian chim ning le bang ahcun vawleicung bomber ah speed a rang bikmi a si an ti. Zeiset ahdah an tumter i missile a phirhmi pawl hi zeikodah an si hnga tiah Ukraine nihcun an ngiat thlai lio pi asi.

Russian hi ai chim ning tluk in thazaang le hriamnam ai ngeih lo, a hriamnam zong thattuk in a chimmi pawl hi ralram ah a chim ning tluk in a rak si lem lo tiah hmuh khawh asi. Tulio jet fighter tha bik ai ngeihmi Su-35 Flanker-E hman kha Ukraine nih an rak thlak piak lio ah cockpit an zoh tikah a GPS pawl kha zei ngaingai a rak si lo tiah an ti. Tank tha bik ai ngeihmi T-90 pawl zong kha software thitha a rak i ngeilo ti asi.

A ngai tak lo ahcun 1950 Korea War lio i Soviet Union nih MiG-15s an rak ngeihmi kha US nih an rak tihtuk, a hnu ah US kut a phan i a engine an vun check cu US jet fighter nak in a rak tha lo deuh timi ah vun hmuh, a pilot pawl kha an rak thiamtuk ruangah a rak si. Tutan i Russia nih missile defense system thabik kai ngeih a timi S-300 le S-400 hna khi US HIMARS hman an rak kham kho huaha lo. ICBM tha le nuclear kong a chim lengmang mi zong hi a chim ning cun tih a nung lai lo timi cu a vun i fiang ngaingai.

Ukraine cu US le NATO nih hriamnam thatha in an bawmh chin lengmang, tuhi Ukraine pilots pahnih zong F-16 jet faghter mongh cawn ah US an phan cang, tiah NBC News nih cun a ti. US nihhin vanlawng zong Ukraine hi a pe lai lo ti khawh a si ti lo, hi ral hi daih lei nakin zual lei panh chin lengmang dawh asi ko.