A Poi Chin Lengmang Ee; BOC Hmai Ralkap Nih An Conghnak Hmun Cu Zaan Ah Bomh An Puah!

Hakha Khuathar BOC hmai Ralkap nih an conghnak hmun cu zaan ah bomb an puah! Hakha Khuathar BOC hmai Inwa Bank hmai Ralkap nih an conghnak hmun cu March 27 zinglei suimilam 4 tluk ah a ho hngalh lo mi nih bomb an puah.

Hi kong he pehtlai in Hakha khuathar BOC kiangkap Um mi pakhat nih “ A thawngpang kan theih hi zinglei ah a si. Kan lau ko. Ralkap le Palek umnak hmun a si i anmah maw an si hnga tiah kan ruah nain zinglei ah a kiangkap um mi checkhlatnak an tuah hna.

Hohmanh nih leng an chuah fawn lo i ruah awk a har ngai,” tiah a chim. Hi puahkehnak kong ah Ralkap lePalek nih Hakha khuachung BOC hmai, Hakha lamtonnak, MEB hmai tibantuk in aa chawk let mi chekhlatnak an tuah hna. Checkhlatnak an tuah mi cu biapi in a zum har mi hriamnaam an I ken le ken lo le an phone zong an Check hna. Credit: Democratic Voice of Chin-DVC

Relchih ding: M Thawng Kam Tialmi: Tu Caan I Daite na um ahcun!!! Persia pennak tang ah Judahmi hna hrawhdih ding in rawiphiar an rak tong. Siangpahrang nupi Esther nih a theilo. A pu nih a chimh. A pasal, siangpahrang sin va chim kha Esther nih a ngamhlo. Cu caah a pu nih ‘hi bantuk lio can I daite I na um ko ahcun … nangmah le na pa ciruang hna cu nan thi lai.. ‘ a rak ti.

Tulio Kawlram chung buainak hi Esther chan Judahmi hna tuarnak he aa khatbak ko. Hi lio caan I daite um cu himnak silo in thihnak ding tu a si. Esther thluak chung ah a lang colhmi cu mah nawl in siangpahrang va ton cu ka thi kho tiah a ruah. Cu caah a tih. Tulio mizeimaw nih CDM ka tuah ahcun zeitindah kan nun lai tiah nan phang. Nain kha nan phanmi kha nan hmailei chan tiang thihnak ding lehlam a si.

1. Tanhmi ka ngeilo ti I daite i-umter hi ralkap tanh a si. Ralbawi Zaw Min Tun nih pei a au lengmang mi hna tham cu ram mipi I 15% lawng an si a ti kha. A aulo mi kha anmah lei tang ah an I ruah I thazaang ah an I lak. Na au a hau, na tum a hau, na chuah a hau.

2. Cozah riantuan pawl CDM tuahlo hi ralkap dirpi a si. Keimah rian thingte ka tuan ko tiah I chim ter hlah. Na rak rianhmi cozah a um tilo. Uknak chuttu ralkap thawnnak na tuah a si. Khakha zir a si.

3. Mi tampi nih nunnak an hloh, ningcanglo tuk thahnawn an ton lio le ralkap puarhrang uknak duhlo I an au an chuah lio ah zung na kai rihmi nak in miphun rawiphiar a um tilo. Kha thahnawnnak a tuahtu hna leikap na tan a si. Thisen nai neh ve kha philh hlah.

4. Miphun ralkap hna an thawn a herhbik lio can a si. An derthawmnak lawng chim peng can a silo. Dirkamh I a thawnter tuding si can a si. Hriamtlai hna hi mithah le minawn an duh ruang ah hriam an tlaihmi a silo. Miphun covo hlamthan nak caah nun thapmi tu an si. Hi lio can ah I theihter duhlo I daite na um ahcun thihnak thiamthiam na zunding a si ko.

5. Zumhnak ruang ah CNF/A ca pek duhlo I um kha zumtu fel sinak a silo. Ralhrang Kawl ralkap nih duhpaoh in thahnawnnak tuah ko rih hna seh ti lam onh a si.

6. Tulio buainak ah mipi le ralkap kar ah itluk (draw) sian ding a silo. Itluk cu mipi caah sungh (thih) a si. Tei hrimhrim a herh. Teinak ding caah daite nai um ter ahcun teinak lam a hla chin lengmang.

7. Tlangcungmi hna caah federal ti lengmangmi hlamnak can, canrembik a si. Hi caan kan tlolh ah cun sungh cikcek a si lai.

Tulio caan, miphun nih rawiphiar a tuar lio caan ah, miphun le ram ca aw le thazaang chuahlo in mah him duh ah daite um hi himnak a silo. Mipi nih teinak a hmuh ko lai. Teinak hmuh tikah cun CDM ah aa telduhlo mi le daite aa um termi hna nih nun nan ngamh te lailo. Tuanbia ah na tlau lan lai.