A Poi Bak Ko! Lai Tlang Khuate Cheu Khat An Lungfah Hi An Mawh  Hrimhrim Lo Ee!!

Chin ramkulh ngandamnak zung lei nih Covid 19 zawtnak runvennak kong he pehtlai in thawngthanhnak an tuahmi cu Chin mi cu Christmas puai zong minung 50 nak tam in i pumh le khawmhnak tuah a ngah lo pinah Christmas Carol Zaanvan zong a ngah lo ti a si.

Christmas le Kumthar zong minung 50 cung lonh loin tuah ding. Christmas Carol zaanvah zong tuah lo ding timi kongah Laitlang khuate cheukhat an lung a rawk ngaingai. Christmas le Kumthar minung 50 lawng tuah ding timi cu Pastor le Khrihfa upa nih maw minung an kan thim kun lai. A ngaingai ti ahcun Khrihfa biaknak zohnak caah caantha an hman bia s i tiah cheukhat nih an chim.

Covid 19 zawtnak cu khuate hrimhrim ah aum lo. Nihin tiang pumh loin caan saupi an khan kham ve cang. A ngaingai ahcun zawtnak cu khuapi deuh lawngah an hmuh. An kan dawt taktak ahcun khuapi in khuate tlawn kham hna seh!

Rampi thimnak Campaign lio vial ah minung duhsat poh in an kan pumh i zeibantuk dantatnak zong a um lo. Kawl puai vial cu duh tawk in an tuah ko. Kawl pawl zong minung 50 lawng cawlcang hna seh. Cun khuapi ahcun ralrin deuh a that caah an phih zong ah ruah ding a um deuh. Dawtnak zong a umlomi khuate tiangin Christmas le Kumthar nisunglawi an kan phih hi cu sullam hrimhrim a um bak lomi a si.

Khuate lei cu lo rian a tuanmi kan si. Khuapi bantuk in internet line a ngeimi le FB le Youtube in thawngth abia a ngai kho zong kan si lo. Zarhpi ni zing kan i pumh mi te hi Pathian lei ah thazaang kan laknak a si.

Kumkhat deng pumh an kan phih cang, khua mi he hmanh i tong loin lo ah a riakmi kan tam cang. Lo lawng te ah caan kan hmang! Cu caah Christmas le Kumthar an kan phih rih hi cu a poi ngaingai. Khuate ahcun zawtnak a um tung lo! Khuapi lawngah pei zawtnak a um ko cu.

Note: Hi thawngpang hi Zapi aw a si, An kan kuatmi a si caah kan mah he pehtlaihnak kan ngei hrimhirm lo. Laknak CRD: VOM