A Nupi A Rak Ihpi Lengmang Caah A Thah, A Ruak An Hmuh Cu An Lau Ko

Nupi le fale he tha tein khua a sa ko mi hna le pasal he tha tein chungkhar a ser ko mi hna pawl nih nudang he ih le padang he ih an hman lengmang mi hi zeiruang bik ahdah a si hnga ti hi ruah lo awk a tha lo. Hakkauh deuh bia maw a si hnga ti zong hi ruah sual a fawi ngai mi a si.

Maggue (မကွေး) pengkulh chung I Bong Kung khua ah tuzing June 29, 2020 zinglei suimilam 7 ah khan lampawng ah an rak hlonh mi mithi ruak pakhat an hmuh. Mithi ruak cu police nih an chek tikah a hngawng ah namte in an samnak hmunkhat, a liang ah hmunkhat le a hnak zawnah hmunhnih in namte sawhnak an hmuh hi a si.

A thih ning konglam an dothlat tikah June 28 zan ah khan U Ye Htein (kum 40) in ah a rak riak mi kum 38 pa a si kha an hun dothlat khawh. A ruak in an hmuh mi kum 38 pa hi kanhnu kum 2019 ah khan U Ye Htein nupi he ai duh mi an rak si I an rak zam bal cang nain U Ye Htein nih le police pawl nih an rak tleih khawh hna ruang ah an rak then hna I cu hnu ah U Ye Htein cu a nupi he cun dai tein khua an sa than hna.

Asinain tuzing June 29, 2020 zinglei ah U Ye Htein cu hmundang ah rian a tuannak in zingkhuang bakin inn ah a rak tlung I an inn chung ah cun cu pa cu a nupi kamlei ah a rak ih ve ko kha a hmuh hna. Cu tikah riantuan nak thadih le zaangba ngai in a um pinah a nupi cu midang nih a umlo karah a rak dau piak lengmang mi kha a celh ve ti lo caah a rak thah hi a si.

Cu ruang ah U Ye Htein cu police nih an tleih I mithah lainawn case pohmah 302 in a hmuh an phonh piak tiah theih a si. Inn pawng mi nih an chim ve ning ah U Ye Htein a um lo caan paoh ah hin hi pa hi a rak ra lengmang tiah zong U Ye Htein an tleih lio ah cun an chim ve.

Source: Akon Thi

 282 total views,  3 views today

This function has been disabled for Chin 11 News.