A Nicaan a luan cang, nain ka lung ah a taap peng mi a si

Martyrs: Salai Ram Hngak le Salai Biak Tin Lian, Kawl ralkap nih Miakpi in (a thli tein) an kah hna ruang ah a nunnak a liam ve mi pasaltha pahnih hna philh lonak, upat peknak le sunlawihnak hi kumtin te sunglawi tein kan hman ve awk a si.

November 19, 2014 ah KIA Sakhan, Laiza ah Traning a kai mi Tlangcung hriamtlia phu hna cu Kawl ralkap nih a thli tein Miakpi in an kah hna. Cu lio ahcun Pasaltha Salai Ram Hngak le Salai Biak Tin Lian zong an nunnak a liam ve.
Kha lio ahkhan Tlangcung hriamtlai dang hna zong an nunnak a liam len ve. Rakhine ralkap minung (8) zong an nunnak a liam ve. Pasaltha hna philh lonak le Upatpeknak cu Rakhine khuapi Sittwe ah Rakhine miphun nih an tuah mi ka hmuh, kum 6 a tling cang, nain a kum 6nak tiang zong ah kan hawidang nih cun upatnak le philh lonak caan sunglawi tein an hman piak peng hna.

Miphun zalennak, mah tein khuakhan Lairelnak kan hmuh khawhnak ding ah tiah chungkhar, unau chuapi kal tak in thisen le nunnak thap in hriam a tlai mi hna, dothlennak an tuah cuahmah lio ah ralkut in a nunnak a liam mi kan pasaltha hna i kan miphun nih philh lonak le upat peknak kum tin te kan tuah piak ve hna awk a si. Cu cu a phu hrimhrim fawn.

CNF Camp Victoria ahcun an tuah men ko lai, nain Chin mipi nih kan hmu hna lo. Thantlang a si lo ah Hakha Khuapi tal ah kumtin te sunglawihnak, upatnak le philh lonak caan kan hman piak hna ahcun, cu an tuanbia cu mino thinlung ah a thar in thlaici tha ah a chuak kho mi asi. Cu lila nih cun Miphun chung ah dothlennak thinlung zong fak chinchin in a chuah ter khawh. A luat mi kan si rih lo timi zong an kan theih ter deuh lai.

Thantlang le Hakha khuapi ah tuah cu a si kho deuh lo ti a va si hmanh ah, CNF hmunram a simi khua pakhat khat tel maw, a si lo ah Salai Ram Hngak le Salai Biak Tin Lian an khua tal ah kan tuah pi peng hna awk a si. Rakhine zong an tuah ve lengmang ko tung, ziah Chin state ah kan tuah ve lo timi zong biahalnak a si fawn.
An mah pahnih, Salai Ram Hngak le Salai Biak Tin Lian lawng zong an si lo kho, CNF/A nih dothlennak a tuah cuahmah mi lamthluan ah pasaltha tampi nih thisen le nunnak an pek cang lai. Cu hna kong zong a thar mi mino le Chin mipi sin ah chimnak caan a um lengmang awk a si.

Note: Mizei paoh nih zalong tein ruahnak chim relnak nawl kan ngei cio. Cu caah ka lung i a um mi te kha keimah pumpak facebook timeline te ah zalong tein ka tial ve mi asi. Credit: Salai Cung Dawt