A Mak Ko! SAC Ralhrang Bawi An Nupi Le Tiang In Raltuk An Cawn Ter Hna

Ralhrangbu cunglawi bawi hna nih an kuttang ralhrang bawi nupi hna cu a voikhatnak raldoh cawnnak an tuahter hna tiah theih a si. Captain le Colonel (ဗိုလ်ကြီးနှင့် ဗိုလ်မှူး) hna i an nupi le hna cu Mandalay ramṭhen Pyin Oo Lwin, Shan ramkulh Taunggyi le Aungpan khua i a ummi ralhrang hna sinah kan hnuzarh khan an thawk i zarhhnih chung an cawng lai. An cawnmi chungah meithal kah lawng si loin hriamngan hman ning le raldoh ning cheukhat hna an i tel tiah cawnnak aa telmi hna nih an chim.

Ku 2021, Feb 1 i nawlngeihnak lak hnu in ralhrangbu hnuchit in a zammi an tam cang caah minung a i nguhdeih ti lo i atu bantukin an nupi le tiangin raldoh an cawnter hna hi a si tiah The Irrawaddy nih cun a ṭial. Hmasa zongah ralhrang nupi hna raldoh an rak cawnter cang hna nain bawi hna nupi tiang cawnter a rak um lo.

Pyin Oo Lwin i ralkap university i Captain nupi pakhat nih cun “A voikhatnak ralbawi hna nupi le raldohnak cawnnak kan ngei. Tutan cawnnak ah Captain le Colonel nupi hna kan i tel” tiah a chim. Ralbawi nupi hna raldoh cawnnak cu a rauh hlan ah ram pumpi i battalion kip ah thawk a si lai tiah theih a si. A voikhatnak cawnnak ah aa telmi pakhat nih “Zeiruangah ti kan thei lo, anmah nih cun a herh caah an kan ti ko” tiah a chim.

Hmuhtonnak tampi a ngei cangmi tlangcung hriamtlaibu hna le ralhrang uknak duh lo ruangah lungfah in hriam a tlaimi mizapi ralkap he kahdohnak ah ralhrang cu nikhat hnu nikhat an thimi an tam chin lengmang. Cu pinah ralhrangbu hnuchit in a zammi ralkap zong an um peng fawn.

Cuti i a thimi le a zammi hna airawlh kho dingin ralhrangbu nih anmah ṭanhtu Pyusawhtee, USDP chungtel cheukhat le ralkap hlun hna chungin minung an kawl peng tiah theih a si. Ref: The Irrawaddy, The Chin Post

Be the first to comment

Leave a Reply

Your email address will not be published.


*