A Fiang Bak Ko Hi! Chim Ding Dang A Um lo!

Saya Tluang (GTI Principal, Dr. Salai TZT) nih CNLD lutlai pawl sinah biahalnak a tuahmi cu, CNLD-CEC Secretary Salai Ceu Bik Thawng nih lehnak a tuah. CNLD Secretary bialehnak cungah Saya Tluang request bang in tlawmte ka von thai ve:)

Saya Tluang nih a halmi hna #1/#2/#3 cu, Miphun Covo cu aho sinah, zeitindah, zei caan ahdah nan lak khawh lai? tiah a halmi chung in lehnak te lawng kan zoh lai.

#1 “Aho sin” timi ah Salai CBT nih a lehmi cu: “NLD+Ralkap (2016 — 2020) ninin ni tiang. Cucaah fianghlang in chim ko ahcun “Kawl (cozah+ralkap)” sinin kan lak than lai.” a ti. Cozah + Ralkap a ti tikah, Cozah cu, NLD a ti duhnak a si caah, CNLD pawl nih Miphun Covo cu “NLD le Ralkap” sin in lak an itimh tinak a si. 🙂 Asicun, Chin miphun Covo cu NLD Cozah sin ah a um maw? Um hlah e! Ralkap sin ah tah a um maw? Um hlei hlah! Khawika dah a um kon? 2008 phunghrampi ah ralkap nih an khumh cang i, tawh an hrenh. An hrenhnak tawh/key cu tawh/keys dang pahnih in an hrenh chap i tawh/key cu anmah ralkap chung in 25% nih an ven. Cucaah, 2008 phunghrampi awnnak/tawh/key latu ding ahcun NLD + CNA an si a herh kan ti cio lio ah CNLD nih NLD le ralkap sinah Miphun Covo lak an itimhmi cu rilikam thetse ro cungah sur kan vawrh lai i, nga kan tlaih lai tiah mipi hlen he aa khat ka ti. 🙂

#2 “Zeitin nan lak lai” timi a lehmi ah: (self-determination & federal) tling cu kanmah lawng cun kan la kho dih lai lo’ a ti. Mahhi a chim dik. CNLD nih an la kho lai lo.🙂 A von peh rihmi ah “Tlangcung hriamtlai le tlangcung party le tlangcung mipi dihlak kan idirkamh lawngin kan ngah ding khi a si.” a ti. A chim ning ah “Tlangcungmi mipi dihlak kan idirhkamh lawng ah” Miphun Covo lak khawh ding cu a har chinchin lai tinak a si. Zeicatiah, Tlangcungmi mipi dihlak idirhkamh dih ding cu thil fawi a si lai lo. Cun, a point 3nk a pehmi cu, “Hluttaw chung lawng zongin a ngah thlu ding si lo i remdaihnak cabuai (peace dialogue) lam in nawr ahau’ a ti rih. 3nk zong ah Miphun Covo lak a har ning, Hluttaw chung zong in a ngah hlei lai lo i, Peace Process in nawr a herhnak a langhter chap. Cucaah, point #1/#2/#3 a lehning zoh tikah “CNLD nih Miphun Covo kan lak tthan lai. Kan vote u” tiah slogan an aupimi hi amah bia lila zoh in a si kho lomi an aupi ning a fiang tuk.

#3 Zei caan timi ah a lehmi cu: “Miphun Covo khuakhirhnak lamthluan kan kalpimi hi dothelnnak(revolution) a si i kum 70 leng a rau cang i zeican kan rauh rih lai kan thei lo” a ti. CNF nih kum 30 dengmang te an doh cang. Karen le Kachin hna nihcun over 50 years an doh cang nain, nihin tiang ah an hmuh khawh rihlomi Miphun Covo cu, zeitindah Kum 5 chung te lawng a ttuan hnga dingmi Party/CNLD nihcun kum 5 chung ah an lak khawh khe lai? A si thiam lomi slogan an aupi ning kha anmah bia lila nih a si khawhlonak a fehter ko:)

Note: CNLD an slogan ah “Miphun Covo kan lak tthan lai” an timi cu anmah le anmah an ihleng tluk a si tiah ka ruah. Mipi zong an hlen hna in ka hmuh. Zeicatiah, anmah CNLD party hrim nih Miphun Covo lak hi an target a si lo. An hmuitinh/target cu Chin State ah ah Cozah tlaih hi a si. Chin State Cozah tlaih cu, Miphun Covo laknak hmun a si lo. Amah Salai CBT nih Thantlang No 1 a ngiar ning siseh, Pu David NS a peknak siseh, Pu NO aa peknak siseh, zumhmi vialte Chin State ah an ipawng dihmi tuak tikah an target cu a fiang ko. Cucaah, Hakha ah Cozah ser a target mi nihcun, Vok kan zua lai. Dum kan ser lai. Lam kan remh lai timi slogan aupi deuh ding an si ko, ka ti.

 320 total views,  1 views today

This function has been disabled for Chin 11 News.