A Fak Kho Taktak; Min Aung Hlaing Thiltuah Cu Cohlan Khawh Ding A Si Lo Tiah KNU Nih An Leh Colh!

Tutan ah Ralkap Council hruaitu hna le Min Aung Hlaing Nih KNU hriamtlai hna cu hmaitonh biaruah dingin a sawm hna. A sinain KNU Hriamtlai nih an cohlan piak duh hna lo. KNU phu hi tlangcungmi hriamtlai phu lakah a ngan bikmi an si.

Min Aung Hlaing le a tuanti pawl nih KNU biaruahnak ngeih dingin an sawmnak an cohlan lonak cu KNU nih mipi sinah theihnak an tuah colh. ” Min Aung Hlaing Ralkap thiltuahmi hi cohlan khawh ding a si lo” tiah KNU nih an langhter colh! Ref: RFA

Thawngpang Dang: Phunzai thiam hi teinak sisehlaw aw! Phun le zai hi san a tlai ve kohnga, remhnak a chuahpi ahcun. Sihmanhsehlaw a phunzai pengmi hna nih palhnak an i hmuh ve tawnlo mi hi a poi. Remhnak a chuahpi tunglo caah.

Hmuhning le ruahning aa dang tawn. Cu caah CNF an um awk a silo, hriam tlaih a haulo ti a ruatmi an um ahcun umphung a si ko. Kanan ram a fuhmi Judahmi lak zong ahkhan Izip chuah tak a sianglo mi an rak um ve bantuk kha a si. Sinain Kanan ram phanh duh tung, rawltam celhlo i Izip sabel ngaih pengtung kha cu aa kalhmi a si. Kha hna zainak nih thathnemnak a chuahpi lo.

CNF/A palhnak i cinken tuk hi thluak that a si lemlo. Ram le miphun dawt bia zong a si lo. CNA nih palhnak an rak ngei tak ko. Sihmanhsehlaw a let tampi in, an thathnemnak a ngan deuh. An palhnak cu pumpak cung deuh ah an rak si, an thathnemnak cu miphun ca ah a si. A rak palhmi cu CNA ralkap pumpak an si. Nain a bu in an i palh rihlo, miphun an rawiphiar bal rihlo. Miphun caah an fek.

An kan vuak, kan thilri an rak kan chuh .. tibantuk kha an philh kholo (an mawhlo). Kawl ralkap hremnak, thahnak, tlaihhremnak, satil arva chuhnak, thongthlaknak …ti cawklo a chanchan in kan tong. Miphun in sersarh kan tuar. Cu cung ahcun kan holh ngamlo, a in in kan i in. Azeidah hran deuh awk a si? Huat deuh ding tu iphilh ter, philh ding tu i chinchiah peng!

Ramdang kal an thiam ve, sipuazi tuah an thiam ve. Zapi nih kan tuahmi vialte tuah le tuan an thiam ve. Ziah hi harnak hi an i thim? Cucu an palh maw? San an tlailo, an ral a chia tiah kan soi hna. Ziah cucu an tuahlo, khakha an tilo kan ti hna. Bawmhlo le peklo in zeitindah meithal an ngeih lai? An sin luh duhlo ah zeitindah mi an tam khawh lai? Humzuallo ah zeitindah an him lai? Meithal lo in kut ro in ral cu fuh rai maw?

An pumpak ah zeitluk indah an zaat? Kawl hruaitu hna le tlangcung hriamtlai dang nih an hngalh hna. Remdaihnak ton biacaihnak hmun ah a fiang. Kawlram ramkhel kong a letthal dihtu an si. Tlangcung hriamtlai dang phu hruaitu sihna sehlaw an miphun ning in an hlorh hna lai. Abu min in an thazaang a der. A ngaingai ahcun anmah der a silo. Kan miphun derthawm a si. A tu an sining hi kan miphun hmanthlak a si. A thawn tertu ding nih kan thawnter duh hnalo. A hodah a palh?

Kan uhmi hna, kan hrannak, kan thinhunnak chim hi a za canglo maw? Bawmh lei ah imer awk a si cang lo maw? Atu a herhbik lio can hna tiang i kan phunzai peng ko ahcun zeitik ahdah an (kan) i sersiam khawh lai? An i sersiam cu anmah pumpak caah a si lailo, kan miphun ca ah dawkaw a si lai. Hmaizah an ton ahcun kan miphun nih dawkaw a co ko lai cu. CNF/A pin ah kan miphun aiawhtu bu an um tunglo. Credit: M Thawng Kam