4D In Taang-10 A Awng Ko Nain University Kai Nak Ah Tangka A Ngeih Ti Lo Caah Mitthli He A Um Ko

Zaangfak tuk a si, taang-10 a awn khawh nak hnga ding ah fak piin ai zuam i sifah le harsat tuk buin 4D he taang-10 zong a awng ko nain University cu peh khawh dawh a si ti lo caah mitthli he a um ko. Shwe Pyi Tha pengkulh, Wa Taya khua ah a um mi Mah Moe Moe hi August 9 zan ah thawngthanh nak an tuah mi 2019-2020 cacawn kum taang-10 result ah khan 4D in taang-10 a rak awng ve mi a si.

Moe Moe hi an chungkhar sifah le harsat tuk ruang ah a duhning hmanh in cacawn nak caan a ngei kho lo mi a si i chun poh ah hlawhfa rian a tuan i zaan poh ah ca a zoh ve mi a si. Moe Moe hi chun ah cun chungkhar pawcawm nak caah riantuan a herh caah zaan ah cusin a kai mi tein taang-10 Exam a rak tuah ve mi a si.

Chun nitlak hlawhfa in riantuan peng buin 4D hna in taang-10 a awn khawh hi cu zeitluk indah zuamnak a ngeih ti hi hmuh khawh ngai a si. Moe Moe hi a mark nih a phak kho ah cun B.Ed kai a duh ngai mi zong a si ko nain a chungkhar nih University a kai ah cun tangka thazaang in an bawmhchanh khawh lai lo hi a ruah tikah ngaihchia ngai in a um ko.

Moe Moe hi a hngakchiat lio teah hringtu a pa nih a rak thih taak cang mi a si i unau 8 chuak lakah amah pakhat te lawng hi taang-10 a awng mi a si. Cun tukum hi a kum 2 nak taang-10 a phit zong a si caah 4D he sunglawi ngai in a hun awng ve mi a si.

Source: TawThu AlinnMyay News

 119 total views,  1 views today

This function has been disabled for Chin 11 News.