2020 Thimnak Ah NLD Nih Teinak An Hmu Lai Maw! A Fiang Bak Ko Cang Hih

2020 Thimnak Ah NLD Nih Teinak An Hmu Lai Maw!

(28.9.2020)

CNLD party hruaitu Pu Ngaisak nih Chin state hluttaw kozale hmun 24 ah 6 hi ralkap ta a si i a tangmi 18 dihlak CNLD nih teinak a hmuh ahcun NLD center lei in chief minister thimnak a um ti lai lo. Chin party chungin Chief Minister zong thim a si lai caah Chin State ah CNLD nih cozah tlaih khawh a si lai ti a si. Amah chim ningin Hmun 18 vialte anmah party CNLD nih a tei dih ahcun cozah zong an tlaih khawh lai.

Atu Chin State dirhmun kan zoh tikah CNLD nih dihlak teinak hmuh ding cu a si khomi dirhmun ah a um lo. Hmun 10 hmanh a tei lai maw!

Tahchunnak ah -CNLD hi hmun 10 cu hmuhter rih ko usih law NLD nih hmun tlawm deuh hmuh sehlaw Center ah NLD nih cozah a tlaih cang ahcun State ah a tlingmi lakah pakhat kha President nih Chief Minister caah a thim lai i minister dang cu duhmi a lengmi zong thim khawh a si cang.

CNLD hruaitu, MP cuhtu le tanhtu pawl nih tukum hi NLD nih cozah sernak caah mp 333 teinak a hmuh kho hrimhrim ti lai lo caah usdp ah Kawi a sermi party (30) hna hi cozah serti dingah a sawm te lai. Kannih CNLD zong cu Kawi a sermi party (30) ah a telmi a si caah cozah sernak ah a tel ve lai tiah mipi sinah an aupimi kan theih.

2015 thimnak lio i NLD dirhmun kan zoh ta lai. 2015 thimnak ah tlangcungmi nih hmuhmi MP 102 a si. Rawnmi nih MP 288 teinak an hmuh. MP timi hi Pitu le Amyota hi ka chimduhmi a si. An dihlak 390 an si.

2015 kha USDP nih cozah a tlaih lioah minung tampi nih USDP nih cozah a peh than te ko lai an ti nain NLD cozah a vun kai. USDP cu MP 41 te lawng teinak a hmuh. 2015 thimnak lioah aho party, aho hruaitu zong nih Chief Minister hi President nih a thim lai timi thil sining hi an ruat lem lo. Mah le miphun party nih teinak hmuh dingah cawlcang cio a si.

Shan State le Rakhine State tehna cu anmah Party le miphun party nih teinak an hmuh ve nain 2008 phunghrampi pohmah 261 nih Center cozah nih State Chief Minister cu a thim lai ti a si cang caah Shan le Rakhine state ah Cozah an tlaih kho ti lo. Hluttaw Meeting lawng kai khawh a si i kum 5 chung  Meeting te cu an kai ko.

State cozah cu tlaih khawh a si ti lo. Lingfimmi caah hi pohmah hi remh lomi a si caah mah le miphun party tanh hi cozah tlaih khawh tung lomi cu santlailo a si a timi tampi an um cang lai i Certer cozah a tlaih khawh dingmi NLD a tanhmi an tamdeuh cang lai.

Tukum hi NLD hmuh dingmi mp hi kan tuaktan tikah Cozah a tlaih lioah mp 41 a hmuhmi USDP hi tukum cu a um ti lai lo tambik 10 hi USDP hei si sehlaw 30 hi NLD nih a hmuh chih cang lai.

2015 lioah tlangcungmi hmuhmi 102 ah hin cheuhnih cheukhat  50 cu tlawmbik ah NLD tei ding a fiangmi a si. Atu dirhmun zoh hmanh ah a fiang ko. Tlangcung party pawl nih State mp hmun hi usapek cio i ko. Center lei cu tlawmte lawng an si.

U Shweman party, U Kokokyi party, Daw Tetekhine party ngan pawl nih teinak an hmuh lai maw? Hi party tanhtu pawl hi anmah le party cio in khua thar an tlak ahcun mp tlinnak tiang an si khawh lai. NLD tanhtu minung tampi lakah a cawhmi an si tikah Me pek taktak tikah cun Me tambik hmuhtu nih teinak hmuh ding a si ko caah NLD mp nih teinak an hmuh dih thiamthiam ko lai. Cucaah party dang tampi an um zongah teinak cu an hmuh hlei lai lo.

Cucaah 2015 lioah rawnmi sinin mp 288, tlangcungmi 102 in cheuhnih cheukhat 50, USDP sung dingmi 30, 288+50+30 = 368, Cozah ser khawhnak 333. 368 – 333 = 35 NLD nih cozah a ser khawh hleiah MP 35 hmanh an hlei rih.

Tlangcungmi in mp hi tlawmbik caah ka tuakmi a si. Mah nakin a tamdeuh dingmi state tampi an um ko. Minung santlailo hmanh ah ruling party min in teinak hmuh ding tampi a um.

A cunglei thil sining zohin  2020 thimnak ah NLD nih  teinak a hmuh ko lai timi fiang tein hmuh khawh a si. Keimah hi ka unau, ka pu, ka khuami, ka miphun nih MP an i cuh caah mah tluk NLD ka tanhmi a si lo.

Ram le Miphun caah daihnak taktak, hnangamnak taktak kan hmuh khawh nakhnga  kan duhmi thil a kan tuahpiak khotu NLD ka tanhmi a si. NLD nih kan ram caah a herhmi vialte tuah dih sehlaw kanmah le kan miphun cio kan tanh dih cang lai. Miphun tanh caan a si tikah cun kan dihlak kan tanhti dih cang lai.

Catialtu: Laiki Chozah

 178 total views,  1 views today

This function has been disabled for Chin 11 News.