2020 KUM PRESIDENT THIMNAK LE SAME-$EX MARRIAGE

2020 KUM PRESIDENT THIMNAK LE SAME-$EX MARRIAGE By Zo Tum Hmung

BIAHMAITTHI

Kan hnu thla April chungah a si, Pastorpa nih palepaduh (gay) le nulenuduh (lesbian) tthitumnak kongah President Barack Obama a mawtchiat. (gay-palepaduh; lesbian-nulenuduh tiin Pu Richard Zatu nih a ka leh piak). Ka facebook comment ah a ttial. A ngah ko, tiah U.S. Supreme Court nih bia a chahmi a si tiin ka leh. Nain, a hnuah sau deuh in ka ttial te lai ka ti. Atulawng ka ttial khawh. Church Chairman a rak ttuan bal cangmi le pastor dang zong nih Obama-Biden cozah ruangah ngeihmi aa khatmi tthitumnak (same-$ex marriage) an karh deuh, an ka ti (an min ka ttial lai lo). Cucaah hi kong ttial ding ka duhnak a zual. Pres. Obama-Biden cozah dirkamh kaa tim lo. Pres. Trump ka fak fawn lai lo. Ka theih khawh tawk biadik langhter kaa zuam deuh lai.

1. KA POMMNING

Fiang tein chim hmasa ka duh: palepaduh asiloah nulenuduh tthitumnak ka pom lo. Phundang in chim ahcun ngeihmi aa khatmi tthitumnak ka pom lo. Tthitumnak timi cu nu (woman) le pa (man) kar lak caah a si. Pathian bia a si (1 Korin 7:1-5, Genesis 2:18-24).

Asinain, nulenuduh le palepaduh zong nih nuhrin covo an co ve awk a si tiah ka pom. Zeicahtiah U.S. citizens an si; constitutional rights an ngei ve. (U.S. Constitution Amendment XIV)

2. LGBT MILU ZAT

LGBT tiah theihmi (lesbian, gay, bi$exual, and transgender) hi U.S. ah 4.5% (14.7 million) an um tiah 2019 kum Pew Research Center ah an langhter. Hmun dangah an ttialmi ka zoh tikah 4.5% in tuak ahhin aa palhmi a tlawm bik lai tiah ka ruat. U.S. Census Bureau i July 2019 cazin ah U.S. milu 328 million an um. Cucaah 14.7 million ka chuah. An tam ngai, ruahnak lengin. U.S. LGBT milu cu Denmark milu nakin a let thum renglo an tam deuh. Norway milu nak in an tam deuh. Sweden milu nak in an tam deuh saumau. Upa (kum 18 cung) an si lai caah thimfung thlak tikah an biapi ngai fawn lai.

3. LGBT AN UMNAK

LGBT cu Democrats ah an um. Republicans ah an um. Independents zongah an um. Democrats lawngah LGBT an um kan ti ahcun Zawng nih amah tawkawng hmuh loin mi tawkawng a hmuh timi kan hluan ko hnga.

4. CONSTITUTIONAL RIGHTS

President nih president rian an luh lai ah biakamnak (Oath) an lak hmasa. An chimmi cu: keimah nih Constitution cu ka kham (preserve) lai, ka huphenh (protect) lai i, ka runven (defend) lai, ti a si. Constitutional rights a ngei komi kha an pek hna lo ahcun an biakam an buar ti a si lai.

Cu lawng a si lo. U.S. Declaration of Independence zong nih covo aa tluk tein mikip ser kan si (all men are created equal) tiah a ti. Hi bia hi hlawt a ngah lo, president nih.

5. U.S. SUPREME COURT

Cu lawng a si rih lo. June 26, 2015 ah U.S. Supreme Court nih ngeihmi aa khatmi tthitumnak tuah khawhnak nawl bia a khiah. States nih an khap (ban) kho lo. Khap ahcun Constitution a kalh a ti. Tthitumnak an tuah khawh, phungning tein. State tampi ah an tuah cang.

6. PRES. TRUMP ASILOAH PRES. BIDEN NIH AN REMH KHO LAI LO

Democracy ram U.S. ah cozah ttengnge phun thum an um: Executive, Legislative le Judicial. Constitution hrilhfiah kong hi Judicial Branch (Supreme Court) kut ah a um. Pres. Obama kut ah a um kho lo. Pres. Trump nih a mersan kho hlei lo. Supreme Court bia in bia a tlu. Cucaah Supreme Court nih bia a khiah, LGBT nih tthitumnak an tuah khawh tiin. Pres. Trump tling tthan sehlaw amah duh in a remh kho lai lo. Biden a tlin zongah cu tthiamtthiam. Executive Branch rian a si lo.

Constitution remh an duh belte a si ahcun Legislative Branch (Congress) hnatlaknak a herh hmasa. Atulio CARES Act a nun bantuk a si ve a hau. Asinain, hi tthitumnak kan duh lo tiin Constitution remh ding cu a si kho lo tiah ka ruat. Sumkheng a hnah corhter hnik ka lawhter. An covo a si. An tam tuk cang. An chim kho, an rel kho ve cang. Mithmai an ngei deuhdeuh. An i thup theng ti hna lo. Mirum le thil ti kho an tam.

7. PRES. OBAMA NIH COVO KONG A CHIM

May 9, 2012 ah Pres. Obama nih ngeihmi aa khatmi tthitumnak cu ka hnatlakpi (endorsement) hna tiah a rak ti (ABC News nih a chim). Anih cu nuhrin covo (rights) lei mit in a zoh. Phungthar a ser kho lo. Cucaah federal ah rian a ttuanmi hna kongah an co ve awk a simi tthahnemnak (benefits) a pek hna. Tthitumnak a pom maw, ti ahcun a pom lo.

August 17, 2008 ah Evangelicals ah minthang taktak Pastor Rick Warren nih Pres. Obama cu bia a rak hal (Saddleback Presidential Forum). Tthitumnak timi cu nu le pa kar lak ah a si awk a si; Khrihfa ka si caah athiangmi ikomhnak zong a si fawn, tiah a leh. President a rak i cuh lio a si. Republican Party in president aa cuhmi Sen. John McCain a um ve. A fiang taktak, Pres. Obama a dirhmun hi. Harvard in upadi (JD) a dih ti lawng mitam deuh nih an theih. Harvard Law Review ah president an rak thim. University of Chicago Law School ah Constitutional Law kum 12 chung a chimh fawn. Cucaah U.S. Constitution kong cu nu nih nau ngeih tik i nu maw a si, pa ti an i fiang tluk in aa fiang lai ka zumh. Obama nih Constitution ningin biadik a rak chim. Kum 2015 ah Supreme Court nih tthitumnak a khapmi States cu Constitution a kalHmi an si tiah a ti.

8. JOE BIDEN LE LGBT

May 6, 2012 ah VP hlun Joe Biden nih ngeihmi aa khatmi tthitumnak cu ka hna tlakpi (endorsement) tiah “Meet The Press” ah a chim. Rights an ngei ve awk a si, a ti. Marriage equality a si, a ti rih. Biden a chimmi a dik. 2015 ah Supreme Court nih tthitumnak tuah khawh a si tiah bia a chah.

May 6, 2020 ah LBGT kong a aupitu Human Rights Campaign nih Biden cu president caah an hnatlakpinak kong an phuan. Covo kongah a kan dirkamhtu a si an ti.

9. PRES. TRUMP LE LGBT

Pres. Trump nih LGBT an covo kong mipi theih in a chim ve ko. LGBT chung i Republicans (The Log Cabin Republicans) nih August 15, 2019 ah Trump cu president si dingin an hnatlaknak kong an rak phuan diam cang. Washington Post ah Chairman Robert Kabel le Vice President Jill Homan nih an ttial. Zeicahtiah LGBT caah thilttha tampi ralttha taktak in Pres. Trump nih a tuah an ti. An fak ngaingai.

Cun, Pres. Trump nih palepaduhmi pa Richard Grenell cu vuanci (cabinet) rian a pek. Acting Director of National Intelligence a si. Atu a ttuan lio. U.S. president tuanbia ah a um bal lo. Grenell hi U.S. Ambassador to Germany ah a chiah hnuah hi cabinet rian pi hi a pek. Ambassador cu U.S. ram aiawhtu a si. U.S. muisam a langtertu a si, ti khawh a si fawn.

Pres. Obama nih palepaduh asiloah nulenuduh ahohmanh vuanci (cabinet rank) sangpi a pek bal hna lo. Hi kong ahcun Obama nakin Trump tthangtthat deuh ding le fak deuh ding a si.

10. REPUBLICAN PARTY LE LGBT

2016 Republican National Convention cu Cleveland, Ohio ah an tuah (July 18-21). Trump cu president cuh dingin chiti an thuh. Ni sunglawi taktak a si. July 21 ah palepaduh Peter Thiel cu biachim caan an pek. Stage cungin “palepaduh ka si hi ka uanthlar tuk; Republican ka si hi kaa uan thlar tuk”, a ti bak ko. Campaign lio a chimmi a si lo. Convention bak ah a chim. Thiel cu PayPal a dirhtu pakhat a si ve. Forbes nihcun vawleicung mirum 4-naak ah a chiah. Republican chungtel a si. Cutluk cun Republican hruaitu le Trump nih Thiel cu van ah an hlorh.

Pres. Trump nih Ambassador to Germany caah Richard Grenell cu a chuahpi, 2018 kum ah. Senate nih an pom piak (Yes:56, No:42). Thimfung thlak tikah (R) vialte nih an duh dih. (D) nih an duh lo. Nain, (R) an tam deuh caah Grenell a tling. Palepaduh a si an theih ko. Nain, Pres. Trump nih a duh, a thim.. Anmah (R ) zongnih rian a ttuan kho lai tiah an ruat ve. Palepaduh a sinaak kha cu zeihmanh aa pehtlaih lo. Rian kongkau a si.

11. KHRIHFA BIAKNAK LE LGBT Kan umnak pawng First Baptist Church, Washington, DC nih nulenuduh pastor Sally Sarratt le nulenuduh pastor Maria Swearingen cu pastors ah an lak hna. 2014 kum ah tthitumnak an tuah. 2015 kum ah ordination zong an hmuh. Presbyterian Church (USA) nih LGBT a cohlan diam cang. Ngeihmi aa khatmi tthitumnak zong a pom. Adang chim ding an tampi rih.

Zumtu nun ah Golden Rule a biapi. “Mi nih kan cungah tuah hna set ti nan duh bantuk khan midang cung zongah va tuah ve u.” (Matthai 7:12).

12. PRES. TRUMP LE PRES. OBAMA KA MAWTCHIAT HNA LO

Pres. Trump nih palepaduhmi Richard Grenell cu vuanci ah a lakmi hi mawtchiat ding ah ka ruat lo. Rian a ttuan kho lai a timi kha a thim ko. Palepaduh a si ruangah a lak lo ahcun thleidannak (discrimination) a ngei ti a si lai. Grenell nih Trump kha taza a cuai khawh.

Republican National Convention ah Peter Thiel nih bia chim caan a rak hmuhmi zong lawmhpi awk a si. Trump soisel ding ah ka ruat lo. Party hruaitu hna soisel ding an si lo.

Constitution tangah aa tlukmi covo (equal rights) Peter Thiel nih a ngei ve.

Trump kha vanram kaiter in Pres. Obama kha hell ah thlak ding a si lo, LGBT kongah. Former VP Biden kha Vawrit, Trump kha Cepa tiin tahchunh ding an si hnga lo. President nih Constitution pah chih a ngah lo. Equal rights le constitutional rights asiloah civil rights an dirpi cio a herh. Phundang in chim ahcun marriage equality a si kan ti khawh.

Hi bantuk LGBT kong hi Supreme Court nih a ttha a ti zong hmanh ah siseh, kanmah le umnak state nih kan pom ko an ti zongah siseh, pumpak duhthimnak ah aa hngat. Kan duh kan ti ahcun duh a si, kan duh lo kan ti ahcun duh lo a si ko.

January 31, 2020 ah Pres. Trump nih Kawlram um chungle hna U.S. ah um thai dingin auh khawh an si ti lai lo (Proclamation 9983) tiah nawl a chuah bantuk a si lo. Hi nawl a chuahmi hi a let hlan lo chung a nung. Tuah khawhmi kan ngei lo. Lam a pit. Nain, ngeihmi aa khatmi tthitumnak phung hi cu kanmah pumpak duhthimnak a si. Cozah nih hramhram in a kan hnek kho lo. Kanmah kut ah bia a um. Cucaah Pres. Trump siseh Pres. Obama siseh kan mawtchiat ding a si lo tiah ka ruat.

BIAFUNNAK LGBT ka pom lo, ka nolh rih ko lai. Kan zatlang buu hna nih pom lo leiin an kan cawnpiak ding ka duh ngai. Pulpit cung in siseh, Sunday school zongah an kan cawnpiak caan a phan te lai, ka ruat. Nain, ngeihmi aa khatmi tthitumnak ka doh lo. Nulenuduh ka soisel hna lai lo. Palepaduh ka thangchiat fawn hna lai lo. LGBT ka hlaw hna lai lo. An covo a si, anmah duhthimnak a si ko tiin ka pom. Misual nu kha aho nihdah lungin a chep hmasa ngam lai? An caah thla kan campiak hna lai.

Nov. 3 i president thim tik zongah thimfung a thlatu hna nih LGBT asiloah ngeihmi aa khatmi tthitumnak kong hi biapi tuk ah an ruat lai ka zum lo. Mah le duhthimnak a si, an ti cio ko lai tiah ka ruat.

 237 total views,  1 views today

This function has been disabled for Chin 11 News.