April 22, 2019




Nai hrawng (CNF) thawng le Revolution Day

Nai hrawng cu Lai lei ah CNF nih khua mi hna hranhram in an kalpi hna ti thawng lawng te hi aken kip ah theih cio asi i mah nih hin kan lung akan tuai cio ttheu lai ti ah ka ruah. Nihin hi kan Chin Revolutionary Day a voi 31 nak zong cu asi fawn.

Khua te cheukhat ah cun tlangval tlai tlong deuh hi ram tang hna ah an i thup, khua dang pi pi hna ah an kal ti thawng te hna zong kan theih. Kan theih mi kip hi adik mi an si le si lo cu theih asi lo. Lau tuk in kan theih tik ah kan ar khim cio i a zei ti chim awk zong kan thei cio lo. Tuchan human right nih vulei a cuul dih cang mi  chan ah zei tin dah mah bantuk thil cu a can khawh ti ah mi tampi kan ar khim.

Malaysia i Refugee kan rak sok ka ah hin lawyer pakhat nih bia arak ka hal mi cu nan ram ah hin zei bantuk thil dah a cang i mah ti rum ro in refugees hi nan sok? a rak ka ti i a chim awk ka rak i harh ngai. KIA i an Leader nu pakhat, CNF zong trian a rak pe tu Kachin nu pakhat hi Kachin min in refugee sok awk a tthat lo caah Chin chung ah min khumh  in refugee arak sok ve.  Ka langh ter duh mi cu ral a do cuahmah mi miphun, harnak a tong taktak mi miphun nih refugee an sok kho lo i kan nih cu ti ngai ngai i buainak linsa a tong lem lo mi Chinmi hi refugee sok lei ah cun vulei cung ah minthang Champion kan si ti khi asi. Opportunity kawl lei ah cun kan ngamh hi a sang taktak i min khat, chuah ni khat, nulepa khat, story khat tiang kan um i vulei cung ah a um bal lo mi thil tiang kan chuah ter.

Ttha te i khua kan ruah ah cun mah vialte refugee sok in ram dang a phan mi miphun nih hin khat lei ah dohthlennak maw asilo ah a taktak in thil a tong mi hi zeimawzat chim tlaak cu kan rak um ve hrim hrim ding khi asi i atu Chinram chung i kan ton taktak mi piahtana le kan virhkhoih mi opportunity hi ai balance lo tak tak khi asi a ngai te ti ah cun. Atu zong Malaysia ah UNHCR nih cu tin an ti e kan ti ah cun vanchiat ngai ah kan ruah i kan ram ah thil cu tin a um e kan ti ah cun a poi tuk mi ah kan rel fawn tik ah Chinmi phun hi mah hngal lo taktak hi maw kan si ko i ti lo awk kan ttha ti lo.

Nai te kha Lai lei ah ka tlung i CNF camp zong cu ka va phan ve. Ka lung ah a um ngai mi cu US Citizen Exam kan phit ah kum 18- 26 karlak ah zeidah miphun ca ah na tuah ti mi question an kan hal bantuk khin Chinmi zong hi kum 18-26 karlak ah a tlawmbik thla 6 tal cu (khuami nih cawmken in) CNF sin ah training rak kai hna seh law a ttha tuk ko hnga ti khi asi. Zeicaah ti ah hi bantuk ralkap lei training hi cu pa asi mi nih zeimaw tal cu thiam ve hrim hrim aherh mi asi i ram le miphun nih ai sehchih mi principle zul te in caan tlawmpal an nun an thaap mi hi mah pumpak caah siseh, chungkhar caah siseh, hmailei bawah(life) caah asunghnak a um hrim hrim lo. Hriam tlaih ning te hna basic knowledge an ngeih ah cun zeidang lei an khuaruahning zong a pi cal deu cang i khua le ram nih aherh tik ah aherh ning in ttuan vo peek khawh le hmanh khawh ding zong khi an si cang.

Cu caah atu kan peng kan tlang i kan ton mi thil hi thil thar pi khi asi lo, pa tling pasal asi mi nih cun hnuh le rawt le fir hau lo in mah paih bak in i paih ding hmanh khi asi i atu zong cu ti i a ruat thiam lo mi an hnuh an rawt hna tik zong ah hin lungfah pi tuk ding khin ruah ding asi lo. Zei caah ti ah CNF cu Pathian a zum mi an si, ttha te i ai hruai mi an si ko i kan mah chungkhar kan i kenkawi ning nak hmanh in discipline a ngei deuh mi an si ko i caan tlawm pal training an kai hnu ah an huam hraat lo si le an hei kir te ko hnga i an peh zulh huam si le an hei peh zulh te ko hnga. Patling pasal ruah nak a keng mi le bang cu an i chir lai ti hi zumh a um lem lo. A poi mi cu khuatual media ah phun dang tuk in thawng kan i thanh i mi a phin lau ter tuk tik ah thih naknak hmanh i a faak deuh mi bantuk hna i a ruat sual mi kan um caah asi. Ram dang um mi thil sining ai fiang cang mi le bang  nih cun tlung usih caan ngei usih law CNF sin ah an ton mi poh ton ve, an tuar mi poh tuar ve i thla zeimawzat an sin um ve hi kan saduhthah pakhat hmanh asi. Thil sining nih akan peek lo tik ah naal bia sawh ah a ruat mi zong kan um ko lai na in.

Mizoram ah HighSchool Saya rian ka rak ttuan i ka um nak khua hi Mizoram buai lio ah a rak tuar ngai ngai mi an rak si ve tik ah kan ram nih buainak a ton lai ding mi hi an rak caih huam ngai ngai. Pasal patling asi mi nih hliam hmape a ngei lo mi pakhat hmanh kan um lo an rak ti. Hmape ngei lo cu patling an si lo ti khi asi ko. cu bantuk cu ram a buai mi hna khua tual i thil a can tawn ning cu asi. Atu Chinram thlanglei ah linsa ngai in thawng kan theih tik ah chaklei hraap i a um mi nih ai seng lo bantuk i kan um ding asi  maw ti cu khua ruat kho nih cun kan theih dih ding asi ko. Aherh ah cun pa ka si hi rak ka philh hlah uh ti ah min ai pe mi tu pei kan si awk asi leh lam cu.

Ram leng um zapi zaraan zong hi hi bantuk lio caan ah hin kan i hlip hlau ve ding asi i kan pa le nih hin an tuah hnga ding an tlolh mi pakhat hmanh  um lo i an tlam tlinh ve bantuk in kan mah zawn cio i kan rak um ding cu kan rian asi ve. CNF ca i kum khat ah  150 Dollar kan thawh mi hna hi cu a ngai te ti ah cun chim phu chim tlaak ding hrim hrim asi lo. Atu bantuk caan ah hin cun rian a ttuan mi pohpoh thlakhat ah 50 maw 100 maw tal hong kan kholh ve hna seh, vuvai lo te in lap ngai in peek cio ding kan si. Nai zarh ah CNF lei in kan pa Dr. Lian Hmung Sakhong le Lawyer Salai David Ngaisak Washington DC an ra i kan ram thil um tu ning vial te an hong kan chimh i bia ttha te i a ngai mi cu zei hmanh chimh an hau ti lo, cu hlaan vialte i ka rak i tel lo a poi ning  an ti i a luan cia caan i an rak thawh lo mi zong kemh chih viar i thawh ai tim mi hna an um. Chim duh mi cu thil um tu ning kan rak theih lo tuk mi hi asi. Thei usih law kan tuah hnga ding hi kan tuah cio ko hnga i atu bantuk thil zong hi a buai nak lei kap i hmu lo in a herh nak lei kap in thil kan hmuh ah cun miphun pi nih ai hlawk pi lai i kan mipi thin lung zong a dam deuh suaumau ko hnga. Ram tang i ai duup mi, khua chung um ngam lo i a zaam mi zong nih ziah hi maw ka theih lo… khoi…kei mah te in teh ka kal lai an ti hnga i a va ttha tuk ko hnga…

By Salai Bawi Uk Thang

MD, USA Ref: (Lai Forum)

482 total views, 1 views today