May 26, 2019




Zidane Nih Mbappe He Riantuanti A Duhnak Kong

Zinedine Zidane nih Real Madrid a zohkhenh than cang caah Kylian Mbappe cu a mah he hmunkhat ah um ti a duhnak kong a chim. Real Madrid nih Zinedine Zidane an khawh than hnu ah thawngpang thang a tam taktak colh. Zidane hi Paris Saint-Germain he chimceih a tong ngaingai i, a hramthok ahcun Brazilian forward Neymar cu a thli tein a ngiat tiah an rak chim. A tu ahcun France forward Kylian Mbappe cu lak a duh tiah chimceih a si than colh.

Real Madrid nih a hlan tein Kylian Mbappe hi an rak zoh cang i, a tu ah hin cun kum 20 upa Mbappe hi World Cup Champion a si pin ah vawlei cung player tha bik tiah chim a si cang. Hi bantuk a si caah Real Madrid nih PSG forward hi cawk an duh tuk i, Galactico thar caah an helhum lio a si.

Biahalnak cu Zidane nih hi ti hin a leh hna ” Neymar maw Mbappe? Ka player a si lomi konglam cu zeihmanh chim kaa tim lo. Mbappe hi keimah kuttang um dingah ka duh ngai i, a mah bantuk player tha a dang zong keimah tangah um dingin ka duh. A sinain a tu ahcun cu bantuk leikap cu chim ding a si rih lo” tiah a chim.

Manager thar an ngeih hnu ah Real Madrid nih an player pawl cu lehthal an timh cang hna i, an player then khat cu chuah ter i, player thar cawk an duh. An ngeih ciami lakah Gareth Bale cu chuak hmasa cem dingah chimceih a si i, Santiago Bernabeu ah Bale hi a dirhmun a fek ti lo tiah chim ceih a tong taktak lio a si.

Tottenham Hotspur forward thing Bale hi Premier League leiah kir than khawh a si tiah thawngpang a thang i, a sinain Zidane nih kum 29 upa Wales forward konglam hi zei hmanh a chim duh rih lo. Tulio Season chungah Bale hi ruah ning bantuk a si ti lo tikah mi tam tuk nih an soisel cang i, Real Madrid tanhtu tam taktak nih Bale hi chuak seh tiah an chim i, pumpululh a chuih lio cangah an au hnawh tawn.

Bale konglam ah hin Zidane nih “Tu season chungah Bale a dirhmun sining hi chim kaa tim lo i, Game chuih ding 11 a um rih i, hi game ahhin ka hmang rih lai. Gareth Bale hi pumpululh chuih dingin timhcia si i, certual chungah cawlcangh ter hi ka timhmi a si” tiah a ti.

IK

368 total views, 1 views today