March 22, 2019




Zasang Cinzah: CND sullam le zeitindah a rak i thawhkeh ning a si?

CND kong an chim paoh ahhin “Democracy” timi min or “mipi thimmi nih uk” timi tiang vial hi “Chin Miphun caahcun a za tuk cangmi le mipi nih vote te an thlak khawh vemi hi a za ko” tiah mipi vote thlak tiang vial ah Chin Miphun kan tuanbia a tling cang” tiah an COHLANG/ APPROVED bantuk a simi hi kan pale politicians tampi nih a ruah awk an hngal hnga lo maw tiah ka thinlung ah a ra peng.

“Democracy” timi hi “mipi nih an thimmi nih uktu an ttuan lai” timi tiang vial ahhin a tlingmi a si lo.
z“ Democracy” ti tik ahhin mipi thimmi nih a thimtu mipi caah riantuan khawhnak dirhmun a petu phunghrampi le bylaw or structure thate in a hngetmi a um lawngah democracy nih aa timhmi a muru tak cu tep khawh a si.

Post WW2, 1948 era lio, Chin Hills le Burma politics kha nan mitthlam in cuanter tthan hnik ulaw, Falam Conference ah mipi thimmi nih uktu an ttuan lai timi hnatlaknak ah “Democracy” a rak tling maw? Tling naisai hlah! Zebantuk phunghrampi, bylaw or Ukning structure indah thimnak kan tuah lai timi pei an rak ceih tilo cu! “Mipi thimmi” timi tiang vial ah tuanbia an dihter i, Mipi thimmi nih an nawlngeihnak/ authority le position a simi Status ( Federal, State) kha an rak hrelh or an rak itheihter duhlo i “mipi thimmi” timi hnatlakbu tein, thisen dor khat hmanh luanter loin U Nu nih Chin ram cu a rak lak ti khawh a si. Zeicatiah, federal chim lo, State level nak hmanh in a niam deuhmi/ a hme deuhmi Special Division status a kan pek i, Special Division status tangah kan pale le cu MP an rak icuhter hna.

Tlangparmi a dang, Kachin tbk hna cu Prime U Nu pekmi “Special Division Status” hi an rak ilungsi lo caah ral an rak tho i, thisen tampi a rak luang, nain “Chin miphun” vial cu Thisen dor khat hmanh luang loin Pu Vontumawng hmang in Chin Ram cu “Special Division Status” ah an rak chiah khawh caah, Chin National Day cu Pu Vontumawng nih amah tuanbia tlaulonak dingah U Nu a rak hal i, U Nu nih laksawngah a rak pekmi/ recognized piakmi “Ro” a si.

Phundang in ka langhter tthan lai.

Ram pakhat nih “ National Day” tiah a ulhmi ni/day cu Freedom/independent or a hmebik ah federal or state level hmuhnak Ni/Day hi National Day tiah an ulh hna. Asinain Chin miphun cu Special Division Status cohlang in election tuah ding hnatlaknak an sermi ni/day kha National Day tiah an bunh i, Prime Minister U Nu zong nih recognized a rak tuahmi hi, “National” biafang nih Special Division sinak Status hi a thleng kho hlei lai lo tiah Thawngtla/prisoner kha thawng/prison chung lila ah luatnak conglawmhter bantuk a si.

Cucaah, Democracy timi vote thlak khawhnak men ah a tlingmi a si lo. Zalawngte in kan thimmi MP nih a thimtu mipi caah rian a ttuan kho maw timi Status ahhin tampi aa hngat. Nihin ah Kan ram cu Democracy kan ti ko nain kan thimmi MP nih riantuan khawhnak Status taktak an ngei rihlo caah, a tlingmi Democracy kan phan kho rihlo. Cuti a si caah, U Nu ro a simi, ralkap nih an rak thah hrulh nain CNF nih an nunter tthanmi CND kong kan chim/tial tikah ahhin, a chim zia le a ceih zia kan thiam ngaingai a herhmi a si tiah ka ruah. Cu lo ahcun, kan tuanbia hi, Thawngtla/prisoner cu a luatter hlei ttung loin thawng/prison chung ah luatnak tuahpiak bantuk si peng ding hi aa dawhlo ngaimi a si. **

Ref: Zasang Cinzah

60 total views, 1 views today