2010 Le 2015 Ah Tiah Ithimhnak Voi 2 A Um Hnu Ah Atu Kum 2020 Ahhin A Voi 3nk Election Kan Phan Lai

Catialtu: Zasang Cinzah

2010 le 2015 ah tiah ithimhnak voi 2 a um hnu ah atu kum 2020 ahhin a voi 3nk election kan phan lai. Tutan election ah a lut hnga dingmi candidate an iphawt ning zoh tikah 2010 le 2015 lio nakin a von idang sup. A vun idang nak zawnte cu, aa pe hnga dingmi Candidates pawl nih phaisa a umnak rim hmimh in icuhnak hmunhma an kawl hi a si.

Thantlang in Pyithu Hluttaw le Amyotha Hluttaw seat 2 nakin “Chin State Hluttaw No.1 le No.2” hi an duh deuh. Zeiruangah? Pyithu Hluttaw le Amyotha Hluttaw MP cu Zikhnawh le Lakphakti dinnak petu an um lonak hmun, Naypyidaw lei ah an va kal a hau. Cucu mi zeimaw nih an huam ti lo.

Thantlang peng aiawh/Pyithu Hluttaw le Chin State pi aiawh/Amyotha hluttaw cu “Naypyidaw” ah zung a kai dingmi an si. An rian hi rian sang ngai a si. Rian biapi ngai zong a si fawn. Asinain Naypyidaw ah va kal i, khual bantuk in va um le chawva lei in miak hmuh lonak hmun a si caah minung tampi nih an hrial deuh. Mahhi tulio election boruak ah a von lang pah ngaimi pakhat a si.

Zeiruangah Chin State Hluttaw No.1 le No.2 cu an duh? Hi hmun ahcun cabuai tang ah sui/gold a chuahnak hmun a si. Inn hmun kong ah maw, Lo kong ah maw, Dawr tuahnak kong ah maw, mawtawka lam kong ah maw, a phun phun kong ahhin Chinmi nih zung/office lei an kal paoh ah Phaisa fun te, a hme maw a ngan iken lo hrim in, kal a ngah lohnak hmun ah a tthu dingmi an si. Cucaah, thlafatin te, nifatin te cabuai tang ah Phaisa funte an char dingmi a tuakmi caahcun, ahodah Naypyidaw lei kal cu a huam lai?

 177 total views,  1 views today

This function has been disabled for Chin 11 News.