04/21/2020 US Covid-19 Update: A Thi Mi Le A Dam Than Mi Hna Langhter Nak

President Trump nih kan hmuh khawh lomi kan ral hna nih virus bom an kan puah hnawh caah minung tam tuk kan thi. Kan ram sipuazi vialte a rawk, Rian ngei lomi million 22 an si cang. Rian ngei lomi hna bawmhnak, unemployment benefit a sawkmi 5.2 million kan si cang caah US rammi hna kan iven a herh tiah twitter ah a tial. Immigration he pehtlai in zeibantuk dah kham an si lai timi a fiang rih lo. Tuzan lei press conference ah fiang deuh in theih kawh a si te lai. Immigration kham dingmi ah hin, Coroanvirus a thiang rih lomi ram, US ah riantuan in a ra dingmi hna khamnak le US ramri rengh chapnak le immigration ah renghnak tampi a tel lai tiah ruah a si.

Tuchun tiangah US ah a thimi, minung 42479 an phan. Nizan lawngah minung 3464 an thi. A zawmi 791962 an phan. Nizan lawngah a zawmi, 53039 an i chap. Minung 60000 tiang cu kan thi kho tiah President Trump nih a chim. Tutiang ah zawtnak a chek cangmi 4.3 million renglo an si cang. Minute 15 a raumi, Virus testnak thilri a um cang caah nifatin minung a sing in an chek khawh cang hna. Nizan tiangah adam thanmi, 71895 an si. Nizan lawngah a dam thanmi minung 3610 an i chap ve. New York khua pakhat lawngah minung 18929 an thi cang. Nizan lawngah ah New York i a thimmi, 1258 an si. New York khua pakhat lawng i a thimi minung hi US ram pumpi a thimi 40% tluk a si.

President Trump nih State cozah le business pawl onnak cu White House taskforce hna nih an sermi guidline ning in mah le state cio nawl a si lai a ti bantuk in hawi hlan bik a ong dimi state cu Texas an si lai. State pakhat le pakhat ah zawtnak a faak deuhmi le a din deuhmi a um caah an on caan ikhah dawh a si lo. Asinain state pakhat le pakhat a neihniam mi pawl cu hmun khat ah on ti dawh an si. Hawi hlan bik ah a ong dingmi state cu 29 hrawng si dawh an si. Michigan, Ohio, Wisconsin, Minnesota, Illinois, Indiana le Kentucky hi hmun khat ah on an timh. New York, New Jersey, Connecticut, Pennsylvania, Delaware, Rhode Island le Massachusetts hi hmun khat teah on an timh ve.

White house taskforce hna nih press conference ah US ram pumpi on thannak dingah guideline an tuahmi vialte an thanh cang. US on thannak ah a herhmi resource vialte guidline an pek hna, phase one, phase two le phase three tiah an then piak hna.

Phase one hi cu a thlengmi tlawmpal te lawng a si. Phase Two le Phase Three hi a biapi ngaimi an hung si. Phase one ah minung 10 tiang i pumh khawh a si lai i, gyms pawl zong on khawh a si lai.

Phase two ah hin minung 50 tang i pumh khawhnak le sianginn, restaurent, bar, daycare le camps pawl on khawhnak a tel lai ti a si. Sport zong zeimawzet cu i celh khawh a si lai.

Phase Three ah hin zalong tein riantuan khawh a si lai. Sizung zong on than a si lai i, mizaw zoh zong a ngah lai. Zalong deuh in khual zong tlawn khawh a si te lai. Asinain Social distancing hi cu a um rih lai.

President Trump nih Tuluk cozah nih thuh nawhmi ngei lo tein coronavirus a thawnak finghlang tein a chim a hau, coroanavirus cu Wuhan lab pakhat i a zuh le zuh lo US cozah nih biatak tein hlathlainak kan tuah lio a si a ti. Japan nih Tuluk ram i auto motors senak sehzung pawl cu Japan ram ah kir than ding in nawl a pek. Germany nih coronvirus ruangah an ram nih a sunghmi vialte cu Tuluk cozah nih a liam a hau tiah a ti. Uk le Australia zong nih Tuluk cozah cu biatak tein hlathlainak kan tuah a herh tiah an chim ve.

Catialtu: Salai Lairamthang

 280 total views,  2 views today

This function has been disabled for Chin 11 News.