04/18/2020 US Covid-19 Update Le President Trump Nih On Thannak A Tuah Mi Thawngthanh

Tuchun tiangah US ah a thimi, minung 37139 an phan. Nizan ah minung 2434 an thi. A zawmi 709201 an phan. Nizan lawngah a zawmi minung 64378 an i chap cang. Tutiang ah zawtnak a chek cangmi 3.8 million renglo an si cang. Virus testnak thilri tlamtling deuh in a ngeih cang caah nifatin minung a sing in a chek khawh cang hna. Nizan tiangah adam thanmi, 59997 an si. Nizan lawgah a dam thanmi minung 1973 an i chap ve. New York khua pakhat lawngah minung 17137 an thi cang. Nizan lawngah New York i a thimmi, 1031 an si. New York khua pakhat lawng i a thimi minung hi US ram pumpi a thimi 40% tluk a si.

Tuchun tiangah US um Chin miphun chung in a thimi pahnih an um. Washington D.C Area ummi Tedim lei kan uanau pakhat le Michigan state Battle Creek ummi Falam lei kan unau an si.

President Trump nih cozah le business pawl onnak nawl cu anmah le state cio nawl a pek hna bantuk in hawihlan bik ah ong hmasa bik dingmi state cu Texas an si lai. State Governor hna nih an duh ahcun phase one cu on khawh colh a si ko tiah a chim. Asinain state pakhat le pakhat ah zawtnak a faak deuhmi le a din deuhmi a um caah an on caan ikhah dawh a si lo. Asinain state pakhat le pakhat a neihniam mi pawl cu hmun khat ah on ti dawh an si. Hawi hlan bik ah a ong dingmi state cu 29 hrawng si dawh an si. Michigan, Ohio, Wisconsin, Minnesota, Illinois, Indiana le Kentucky hi hmun khat ah on an timh. New York, New Jersey, Connecticut, Pennsylvania, Delaware, Rhode Island le Massachusetts hi hmun khat teah on an timh ve.

White house taskforce hna nih Thursday press conference ah US ram pumpi on thannak dingah guideline an tuahmi vialte an thanh cang. US on thannak ah a herhmi resource vialte an pek hna pin ah federal cozah nih on than dingmi cu, phase one, phase two le phase three tiah an then piak hna.

Phase one hi cu a thlengmi tlawmpal te lawng a si. Phase Two le Phase Three hi a biapi ngaimi an hung si. Phase one ah minung 10 tiang i pumh khawh a si lai i, gyms pawl zong on khawh a si lai.

Phase two ah hin minung 50 tang i pumh khawhnak le sianginn, restaurent, bar, daycare le camps pawl on khawhnak a tel lai ti a si. Sport zong zeimawzet cu i celh khawh a si lai.

Phase Three ah hin zalong tein riantuan khawh a si lai. Sizung zong on than a si lai i, mizaw zoh zong a ngah lai. Zalong deuh in khual zong tlawn khawh a si te lai. Asinain Social distancing hi cu a um pah rih lai.

Coronavirus ikhawhnak caah ram kip nih vaccine a ran khawh chung in ser khawh cio an i zuam. US ah Pfizer, Johnson & Johnson and Merck biatak tein serchuah an i zuam. England, Australia le China zongah ser an i zuam. Tukum kum dih lai ah cun an serchuah lai tiah zumh a si. Coronavirus zawtnak thlopnak caah bawmchantu a si tiah an ruahmi si phunkhat cu American Chicago Gilead Sciences An Medicine Company nih Remdesivir timi si an ser i, an test lio a si.

Nizan ah President Donald Trump le ramthangcho bik ram 7 teleconference meting an tuah i, US nih WHO bawmhnak a phihmi cu an lungtling. President Trump nih Tuluk cozah nih thuh nawhmi ngei lo tein coronavirus a thawnak finghlang tein a chim a hau, coroanavirus cu Wuhan lab pakhat i a zuh le zuh lo US cozah nih biatak tein hlathlainak kan tuah lio a si a ti. Japan nih Tuluk ram i auto motors senak sehzung pawl cu Japan ram ah kan kirter hna lai tiah an ti. Japan nih kanmah ram teah kan herhmi kan chuahve a hau cang tiah an chim.

Catialtu: Salai Lairamthang

 209 total views,  1 views today

This function has been disabled for Chin 11 News.