๐ˆ๐ฏ๐š๐ง๐ค๐š ๐“๐ซ๐ฎ๐ฆ๐ฉ ๐ก๐ข ๐ƒ.๐‚ ๐ข๐ง ๐“๐ก๐จ๐ง๐ ๐ข๐ง๐ง ๐š ๐๐š๐ง๐ก ๐ค๐ก๐จ ๐ฆ๐ž๐ง โ€“ ๐š ๐‘๐ฎ๐š๐ง๐ 

Presidential Inauguration Committee (PIC) nih fund an i ngeihmi ningcanglo in a hman caah, tiin Washington, D.C. attorney general office nih Trump fanu upabik, cun a senior advisor zong a simi Ivanka Trump cu tutan zarh chungah an hlathlai. Fund chungin $1 million lenglo a hman caah le, 2017 president apnak lio i the Trump Hotel an hlanmi man a hleituk lawmmaam a lak hna caah, tiin Trump Organization le PIC cu attorney general office nih January tein khan taza a cuai cang hna.

Tuesday ah khan, Trump cozah nih a buarmi a dang sualpalhnak pakhat kongah fianternak tuah dingin Trump fanu upabik cu hlathlaitu sin a phan. Taza an cuaimi ningah, President apnak committee deputy chairman hlun Rick Gates hruainak tangah PIC nih hin Trump Hotel i hmunhma hlaannak ah ni 1 $17,5000 reet ni 4 chung a pek, tiah theih a si. Cu innkhaan hlanman kongah cun Woldoff a lung a tling lo i, tutan an pekmi man hi cuhlan market rate nakin a let 2 tluk in a tam caah, pumpaak in Trump le a fanu Ivanka a ton hna i a lungretheihnak a chimh hna, cun email zong in a chimh thiam hna, tiah theih a si.

Ivanka lawng si ti lo in, President apnak committee chairman Tom Barrack, first lady Melania Trump le Gates sinin record zong an hal chih hna. Barrack hi Nov. 17 ah khan phuah cangmi a si. President apnak puai a tawlreltu Stephanie Winston Wolkoff zong hi hmai zarh in cun thilh ding a si ve cang. Phaisa hmannak kongah suimilam 5 chung i phehnak tuah ko hmanh sehlaw, Ivanka hi a luat hlei ding a si lo, tiah Stephanie nih twitter ah a tial.

Ivanka hi senior advisor dirhmun ai ngeih ve caah, Trump cawlcanghnak lam cungah a phan ve cang. 2019 lio i hlathlainak an tuah lio ah Ivanka hi cu an hrialter khawh ko nain, Trump cozah nih ningcanglo in thil a tuahmi hlathlai a si tik belte ah chin cun amah zong hi a luat kho ding a si ti lo. A tu i biahalnak a tang rih mi cu: a sualnak nih thonginn a phakter lai maw? ti hi a si.

Ivanka ai telnak a zawnka hi cu parties kongkau ah le, hotel nih a zulh tawnmi fair market rate kalpi dingin an hotel a cawnpiaktu a si, tiah Trump Organization caah general counsel a si mi Alan Garten nih CNN ah a chim.

Asinain, a pa cozah asiloah company kong he pehtlaiin tazacuainak an tuahmi ah Ivanka a min a langh hi tutan lawng hi a si ruam lo. Trump le a business ah dehlennak a um, tiin a tu hi NY state nih hlathlainak 2 a kalpi lio pi a si. Fimcheukhnak rian ca i pekmi chawva kongah a si i, cu phaisa cu Ivanka sinah pek a si theu lai, tiah zumh a si. Asinain, nihin tiangah cun Ivanka a min an langhter lem rih lo.

Moscow i Trump Tower sak an tlolhmi kongkau i khuakhaannak zongah Ivanka ai tel ve i, cucu Mueller i hlathlainak a tuahmi cungah ai tel ve mi a si. Cun 2019 ah khan, Ivanka i ramdang hi business hnatlaknak an tuahmi kong FBI nih hlathlainak a tuah fawn. Nikum ah khan, Ivanka le a a naupa le pahnih cu mihar bomhnak i officers le directors pawl ca i training an tuahmi an kaiter ve hna. Trump Foundation an zohkhenhnak ah cuhlan bantukin phung he ai kalhmi rian an onh ti nakhnga lo ding caah a si. Cuhlan i ningcanglo in an cawlcangh ruangah Foundation tiangin phih a rak si phah bal cang. Cu Foundation cu nonprofits riantuantnak caah a si, phungning tein tuahmi a si ko, tiah Trump lei nih an chim ko nain, checkbook in nonprofit ca i tlawmtete a pekmi sawhsawh a si, tiin NY attorney general nih a ti piak.

โ€œHringtu a pa thong a tlak hlan ah amah Ivanka hi thong a tla hmasa lai, tiah ka zumh. Trump hi thong a tla lai, tiah ka zumh. Asinain, amah a tlak lo ah cun, a fale chungin pakhat deuh paoh hi a tlakter hna lai, Ivanka hlan ah Don, Jr., asilole, Ivanka hlan ah Eric, ti bantuk khin. Asinain, a fiangmi cu, Trump hlan hrimhrim ah Ivanka a tla te lai, zeicahtiah cucu Trump i a sining te a si,โ€ tiin kan hnung thla ah khan MSNBC ah Trump a former sihni Michael Cohen nih a chim. Anih hi Trump campaign le organization caah sualnak phun 2 a buar caah 2018 lio i sual an phawtmi pa a si.

Hringtu a pa nih office a chuahtak hnu hin Ivanka hi politics lei ah ai mer te theu lai, tiah Trump pennak chungah a ummi mi tampi nih an zumh. 2024 election hi ai ngiat kho men, asiloah Congressional seal tal zong a si kho men. Asinain, cu bantuk i mipi ah langsar ngaiin Ivan hi a um ka zum lo, tiah Cohen nih a chim.

โ€œMipi hmaka i langhter a duh lo mi thilthup tampi ai ngeih. Cucu, khakha ka tuah, ti hi a fawi ko. Sinain, media nih a zungzal in na kong cun ceih ding i nan nunnak dihlak vun phozar cu ai phundang ngai te,โ€ tiah Cohen nih a chim. Cu a chimmi cu Whashington Post nih a tial chin.

Dealing kongah ka fanu hi ai tel caah hin, a cungah harnak a tlung kho mi a si, ti hi Trump nih a theih ko lai. Hi ruang ko ah hin teh a si lai, Ivanka telhchih in, hi ti rumro hi rian ai tinh hlan i a fale ngaihthiam khawhnak lam lawng a kawlnak hi a si. Ivanka hi amah pumpaak bakin cun phungbuar in sualpalhnak ngaingai a ngei lem lo nain, Trump a velchum chungah a um i sualpalhnak a tuahtu hna he cun pehtlaihnak cu a ngeih ve caah, zeican dah a vaan a that rih lai, ti hi conh hau a si rih.

Catialtu: Chelsea Bawi